بلوچ لبریشن آرمی ( بی ایل اے ) ءِ جارکش جیھند بلوچ ءَ ماں رسانکدر ءَ وتی شنگ کرتگیں درشانے ءَ گوشتگ کہ بی ایل اے ءِ سرمچاراں زامران، کلات، ھاران، شال ءُ ڈاڈر ءَ ھپت جتائیں کاروائی کرتگ۔اے ارشاں زورگریں پوج،وتگڑیں کشندہ ٹولی ءُ گیس پائپ لائن نشانگ کرتگ اَنت۔ اے میان ءَ پوج ءِ کارمنداں ھوار دگہ کمکار دزگیرکرتگ، آیانی سلاہ ھم برتگ اَنت۔
آئی ءَ گوشتگ کہ زی زامران ءِ ھند تنک ءَ سرمچاراں پاکستانی پوجءِ کارمندے گوں اسنائپر ارش ءَ کشتگ ءُ ارش ءَ کارمرز بیوکیں پوج ءِ کواڈ کاپٹر ھم جتگ ءُ دور داتگ۔
جارکش ءَ گوشتگ کہ بیست ءُ یک ستمبر ءِ شپ ءَ شال ءَ شیک زاھد نادراھجاہ ءِ نزیک ءَ شھدگ بستگ ءُ ھمے میان ءَ پولیس کارمند دزگیر کرتگ ءُ سلاہ پل اتگ اَنت ءُ پد ءَ یلداتگ اَنت۔ ھمے شپ ءَ ڈاڈر ءَ کمبڑی پھلءَ گیس پائپ لائن گوں تراکناکیں شورھاں تباہ کرتگ۔
آئی ءَ گوشتگ کہ نوزدہ ستمبر ءَ ھاران ءِ ھند برشونکی ءَ بی ایل اے ءَ کشندہ ٹولی ءِ سروک ھاپز ممتاز ءِ ڈوار ءِ سر ءَ ارش کرتگ، اود ءَ دو کمکار دزگیر کرتگ۔ ڈوار ءَ ایریں سلاہ ءُ سامان دستیگ کرتگ ءُ ماڑی مانداشتگ۔ ھمے ھند ءَ سرمچاراں لیویز چوکی دستیگ کرتگ ءُ چار کارمند دزگیر کرتگ، پد ءَ یل داتگ اَنت۔
جارکش ءَ گوشتگ کہ ھژدہ ستمبر ءَ کلات ءِ ھند منگچر ءَ پوج ءِ دگ بندی ءِ میان ءَ سرمچاراں دستی بمب ارش کرتگ،ایشی آسر ءَ یک کارمندے مرتگ ءُ سے ٹپی بیتگ۔ ارش ءَ پد پوج ءَ سک تیرگواری کرتگ لس شھری ٹپی بیتگ۔
آئی ءَ گوشتگ کہ بی ایل اے ءِ سرمچاراں کلات ءِ ھند زادہ ءَ زورگریں پوج ءِ ایم آئی ءِ کارمند کیسر اباس جاہ منند کنڈ، گجرانوالہ ءَ دزگیر کرتگ۔ آئی میاریانی منگ ءَ پد بلوچ بلوچ راجی آمیدگس ءَ پیش کنگ بیتگ کہ آئی ءَ مرگ ءِ سزا دیگ بیتگ سرمچاراں کشتگ۔
جیھند بلوچ ءَ ارشانی زمہ واری من اتگ ءُ گوشتگ کہ ھمے کول ءَ کن ایں کہ داں زورگریں پوج ءُ آئی کمکارانی سر ءَ ارش دیم ءَ گوں ترندی ءَ برجاہ بنت۔
