بلوچ راجی آجوئی سنگر (براس) ءِ جارکش بلوچ ھان ءَ ماں رسانکدر ءَ وتی شنگ کرتگیں درشانے ءَ گوشتگ کہ مستونگ ءُ زامران ءَ زورگریں پاکستانی پوج ءِ گون ءَ دو جتائیں میڑاں زورگریں پوج ءِ ھپت کارمند مرتگ ءُ اے میڑاں براس ءِ چار سرمچار شھید بیتگ۔
آئی ءَ گوشتگ کہ مستونگءِ ھند دشت ءَ 12 ستمبر 2025 ءَ زورگریں پوج ءِ ڈرون ارش ءَ پد ھیلی کاپٹرانی سر ءَ کمانڈو ایر کنگ بیتگ ءُ لشکرکشی ءِ جھد کنگ بیتگ۔ اے میان ءَ پوجءُ سرمچارانی میان ءَ میڑ بندات بیتگ اَنت۔ زورگریں پوج ءِ پہ دیم ءِ دارگ ءَ سرمچاراں زورگریں پوج ءِ سے کارمند کشتگ ءُ دو سرمچار ابوبکر پنام مجید ءُ ابدلاھد پنام اسمان شھد بیتگ اَنت۔
آئی ءَ گوشتگ کہ زامران ءِ کوتان ءَ 13 ستمبر ءَ براسءِ سرمچار ءُ زورگریں پوج ءِ میان ءَ میڑے ھما وھد ءَ بندات بیتگ کہ سرمچار گشت ءَ بیتگ اَنت۔ میڑ ءِ آسر ءَ پوج ءِ چار کارمند مرتگ ءُ باز ٹپی بیتگ، دو سرمچار سدیر پنام برمش ءُ اسلام پنام سگار شھید بیتگ اَنت۔
آئی ءَ گوشتگ کہ شھید سنگت ابوبکر کرد پنام مجید ء پتے مھمد مستونگ ءِ ھند دشت ءِ جاہ منند اِنت۔ آ گوستگیں یک سالے بیت کہ بی ایل ایپ ءَ ھوار بیتگ ءُ مستونگ ءُ شال ءِ جنگاں وتی کرد پیلو کرتگ۔
جارکش ءَ گوشتگ کہ شھید ابدلاھد مینگل پنام اسمان ء ھاجی موسا کلاتءِ ھند جوھان ءِ جاہ منند اِنت۔ آ یک سالے پیش بی ایل اے ءَ ھوار بیتگ ءُ مستونگ ءَ راجی ایردستی ءِ بگیری ءَ جنگ ءَ وتی کرد ءَ پیلو کنگ ءَ بیتگ۔
آئی ءَ گوشتگ کہ شھید اسلام پنام سگار ء اتا مھمد مشکے ِھند تنک ءِ جاہ منند اِنت ۔ لوامز زانشتجاہ اوتل ءَ وانگ ءَ پد اسلام پنام سگار ھمے سال ءَ بی ایل اے ءَ ھوار بیتگ ءُ پنجگور ءَ کار ءَ سرگرم بیتگ۔
جارکش ءَ گوشتگ کہ شھید سنگت سدیر بلوچ پنام برمش ء پیرجان تمپ ءِ میتگ سری کھن ءِجاہ منند اِنت کہ آ بنیاد ءَ زامران ءِ مردمے۔ آ گوستگیں سال ءِ نومبر ءَ بی ایل ایپ ءَ ھوار بیتگ ءُ زامران، تمپ ءُ مند ءَ کار ءَ بیتگ۔
بلوچ ھان ءَ وتی درشان ءِ گڈی ءَ گوشتگ کہ مئے شھیدیں سرمچاراں وتی جان ءِ دیمونی داتگ ءُ ھمے پیش داشتگ کہ ایردستی ءَ ھچ وڑ ءَ نہ من ایں۔ اے دیمونی مارا ھمے مارشت ءَ دے اَنت کہ مئے ھمک گام گوں آھوکیں پدریچ ءَ بندوک اِنت۔ گوں ھمے ارادہ ءَ ما وتی جھد ءَ برجاہ دار ایں دانکہ بلوچستان یک آجو ءُ وتواکیں سرڈگارے ءِ پجار ءَ زانگ بہ بیت۔
