بلوچ لبریشن آرمی ( بی ایل اے ) ءِ جارکش جیھند بلوچ ءَ گوشتگ کہ بی ایل اے ءِ پدائی بھرگ مجید برگیڈ ءَ 18 سمبر 2025 ءَ کیچ ءِ ھند دشت ءَ کنچتی دو راھی ءَ پاکستانی پوج ءِ مزنیں کاروانے گوں پدائی ارش ءَ نشانگ کرتگ۔ اے کاروان ءَ شش بس ھوار بیتگ کہ ایشی ءَ درزنانی کچ ءَ کارمند سوار بیتگ اَنت ءُ پہ ایشانی پھازداری ءَ یک لشکرے ھمراہ بیتگ۔ اے کاروان یک روچے پیش چہ کراچی ءَ گوادر ءَ اتکگ ءُ ارش ءِ روچ ءَ چہ گوادر ءَ تربت ءِ نیمگ ءَ روگ ءَ بیتگ۔ اے ارش نیمروچ ءِ یک ءَ گوں مھکمیں شوربندی ءُ شریں سرپدی ءُ سرجم ءَ لشکری نزامے ءِ بنیاد ءَ کنگ بیتگ۔
آئی ءَ گوشتگ کہ مجید برگیڈ ءِ پدائی کاروائی ءِبندات ھما وھد ءَ کنگ بیتگ کہ پدائی سنگت التاپ پنام چاکر گوں تراکناکیں شورہ ءَ باریں گاڑی یے ءَ بنجاھی بس ءَ ڈیک وارتگ، چہ ایشی ءَ یک ٹوھیں تراکے بیتگ کہ بس سرجم ءَ تباہ بیتگ۔ آئی ءَ سواریں درسیں کارمند جاھی مرتگ اَنت۔
جارکش ءَ گوشتگ کہ تراک ءَ پد زوت سنگت پدائی گھرام پنام زگرینءُ ھلیل پنام کلمیر پش کپتگیں بس ءُ ترس آماچیں کارمندانی انگر ءِ میان ءَپترتگ ءُ نشانگ کرتگ اَنت۔ دژمن ءِ پسھی تیرگواری ءَابید دوئیں پدائیاں ارش برجاہ داشتگ ءُ دژمن ءِ تر ءُ گردداشتگ۔ ارش داں نیم ادارے ءَ برجاہ بیتگ ءُ دھانی کچ ءَ دژمنیں کارمندانی کشگ ءَ پد دوئیں پدائیانی سلاہ ھلاس بیتگ اَنت ءُ آیاں بی ایل اے ءِ پدائی نزام ءِ رد ءَ گڈی تیر ءِ سر ءَ کار کرتگ ءُ وت ءَ پہ راج ءُ سرڈگار ءَندر کرتگ۔
آئی ءَ گوشتگ کہ بی ایل اے ءِ زمینی بنشون ءُ چیریں بھرگ ( زراب) ءِ رد ءَ اے ارش ءَ زورگریں پوج ءِ کم چہ کم 32 کارمند مرتگ ءُ درزنانی کچ ءَ ٹپی بیتگ اَنت کہ آیانی تہ ءَ بازیں سروگان ھم ھوار اِنت۔ اے ارش ءَ سے ءَ گیش بس سرجم ءَتباہ بیتگ ءُ دژمن داں باز اداراں پہ وتی لاشانی کشگ ءَ جنجال بیتگ۔ پہ بی ایل اے ءَ اے کاروائی نہ تھنا سوبمندی بیتگ بلکیں ھمے گپ ءِ دلجمی اِنت کہ دژمن بلوچستان ءِ کجام ھم کنڈ ءَ ایمن بیت نہ کنت۔
جارکش ءَ گوشتگ کہ اے ارش ھما وھد ءَ کنگ بیتگ کہ ریاست پاکستان ءُ آئی ھم سنتیں چین بلوچ راجی زرمبشت ءِ بگیری ءَ میان استانی تک ءَ لشکری، سپارتی ءُ کانودی زور ءِ گیش کنگ ءِ جھد ءَ اَنت۔ انوں پاکستان ءُ چین ءَ اکوام متھدہ ءِ سلامتی کونسل 1267 کمیٹی ءِ رد ءَ بی ایل اے ءُ آئی پدائی بھرگ مجید برگیڈ ءِ ناشریں گلانی لڑ ءَ ھوار کنگ ءِِ لوٹ پیش کرتگ اَت۔
آئی ءَ گوشتگ کہ بی ایل اے ھمے پدائی کاروائی ءَ شھید بیتگیں سے ئیں بلوچ پسگاں گوں پھر، شرپ ءُ راجی جوزگ ءَ دروت ندر کنت۔ شھید پدائی سنگت التاپ پنام چاکر ء ابدرھمان بلیدہ، الندور ءِ جاہ منند اِنت۔ آ 2023 ءَ بی ایل اے ءَ ھوار بیتگ ۔ شھید سنگت پدائی گھرام بلوچ پنام زگرین ء پاروک پنجگور ءِھند پروم لگاروک ءِ جاہ منند اِنت۔ آ 2023 ءَ بی ایل اے ءَ ھوار بیتگ ۔ شھید پدائی ھلیل پنام کلمیر ء پزل تربت ءِ ھند سامی بلوچی بازار ءِ جاہ منند اِنت ءُ آ 2023 ءَ بی ایل اے ءَ ھوار بیتگ۔
جارکش ءَ گوشتگ کہ بی ایل اے تچک ءَ گوش ایت کہ مئے درسیں لشکری کاروائی میان استمانی انسانی جنگی کانودانی رد ءَ اَنت زورگریں ریاست ءِ بگیری ءَ ھکی ئیں راجی گھگیری یے۔ زورگریں دژمن ءِ وڑ ءَ بے میاریں شھریاں نشانگ نہ کن ایں ءُ لس مردمانی چیزاں توان نہ دے ایں۔
جیھند بلوچ ءَ ارش ءِ زمہ واری من اتگ ءُ گوشتگ کہ زورگریں ریاست ءَ گوں ترندیں دانکاں کڈن کن ایں دانکہ بلوچستان ءِ سر ءَ زورگپتی برجاہ اِنت مئے سلاہ بندیں گھگیری گوں ترندی ءَ برجاہ بنت۔ دانکہ بلوچ سرڈگار ءِ سر ءَ زورگپتی ءِ گڈی نشان ھست گڑا گھگیری ءِ اے کاروان وتی جنز ءَ برجاہ دار ایت۔
