اسلام آباد ءَ ریاستی زوراکیانی آماچیں کھولانی زھرشانی نندانک ءَ مرچی شست ءُ شش روچ سرجم بیتگ کہ انگت ءَ برجاہ اِنت۔ آیاں بی وائی سی ءِ سروک ءُ زور بیگواھیں مردمانی اکس گوں بیتگ اَنت ءُ پہ وتی لوٹانی ھک ءَ اوگام جتگ۔
چہ شست ءُ شش روچ ءِ سرجم بوگ ءَ ابید ھم سرکار ءِ نیمگ ءَ پہ آیانی لوٹانی گوش دارگ ءَ ھچ وڑیں گامگیج زورگ بوگ ءَ نہ اِنت۔
اے بابت ءَ زھرشانی ءَ نشتگیں مردمانی گوشگ اِنت کہ چہ سرکار ءَ ابید بنجاھی رسانکدر ھم وتی کرد ءَ پیلو کنگ ءَ نہ اِنت۔ آ ھمے لوٹگ ءَ اَنت کہ ما بے اوست بہ بہ این ءُ وتی زھرشانی ءَ ھلاس بہ کن ایں۔
آیانی گوشگ اِنت دانکہ بی وائی سی ءِ سروک یل کنگ بہ بنت ءُ مئے آدگہ لوٹ منگ نہ بنت مئے زھرشانی نندانک برجاہ بیت۔
آیاں گوں انسانی ھکانی ادارھاں لوٹ کرتگ کہ پہ مئے زھرشانی ءِ کمک ءَ مئے گون ءَ توار چست کنگ ءَ وتی کرد ءَ پیلو بہ کن اِت۔
