بلوچستان لبریشن پرنٹ(بی ایل ایپ) ءِ جارکش میجر گھرام بلوچ ءَ گوشتگ کہ بی ایل ایپ ءِ سرمچاراں 16 ستمبر ءَ کیچ ءِ ھند دشت کنچتی دوراھی ءِ نزیکءَ سنگر گپتگ ءُ زورگریں پوج ءِ کاروان ءِ سر ءَ اُرش کرتگ۔ پوج ءِ کاروان لھتیں بس ءُ آیانی پھازداری کنوکیں سے گاڑی بوتگ اَنت۔ سرمچارانی اُرش ءَ پد یک ترندیں میڑے بندات بوتگ کہ آ 45 دمان ءَ برجاہ بوتگ۔ چہ ایشی ءَ کم چہ کم دژمن ءِ چار کارمند مرتگ ءُ سَے ٹپی بوتگ۔ اے میڑ ءَ بی ایل ایپ ءِ سرمچار اتیک پنام کیپٹن میران ءُ سرمچار شیھک پنام آشوب گوں دلیری ءَ جنگ داتگ ءُ شھید بوتگ اَنت۔
آئی گوشتگ کہ سرمچار اتیک پنام کیپٹن میران ء ھاسل ھان دشت پٹوک ءِ جھمنند اِنت ءُ آ 2013 ءَ پہ بلوچستان ءِ آجوئی ءَ چہ بی ایل ایپ ءَ وتی جھد بندات کرتگ۔ بندات ءَ آ ئی شھری چیرجنگی ءَ کار کرتگ ءُ گل ءِ جتائیں زمہ واری سرجم کرتگ َنتءُ پد ءَ 2014 ءَ گل ءِ لوٹانی رد ءَ کوہ ءَ دیم دیگ بوتگ اود ءَ آئی وتی دلیری ءُ بودناکی ءَ جوانیں کرد پیلو کرتگ۔ آ نہ تھنا کوہ ءَ سرگرم بیتگ بلکیں شھری جنگ ءَ ھم وتی کرد شریں وڑے ءَ پیلو کرتگ ۔
جارکش ءَ گوشتگ کہ آ دشت، مند، گْوادر، تمپ، بلیدہ ءُ تُربَت ءَ ھوار جتائیں دمگاں گل ءِ بازیں کاراں ھوار بوتگ۔ چہ آئی دیمونیاں گل ءَ آ پیسر ءَ لیپٹننٹ ءِ اگدہ داتگ ءُ پد ءَ 2020 ءَ شھید کیپٹن ارپان پنام امداد ءِ شھیدی ءَ پد آ کیپٹن ءِ اگدہ ءِ سر ءَ گچین کنگ بوتگ۔ کیپٹن میران ءَ بلوچ راجی آجوئی سنگر (براس) ءِ بازیں سوبمندیں آپریشناں بھر زرتگ ءُ دژمن تاوان داتگ۔ کڈان ءَ دژمن ءِ تیرانی دیم ءَ اوشتاتگ ءُ دیمپانی کرتگ ءُ بنجل ءِ نزیک ءَ شتگ ءُ آدگہ سرمچارانی ھواری ءَ درزناں گیش کارمند کشتگ۔ ایشی ءَ ابید آ آپریشن بام ءَ ھوار سبدان، متسنگ ءُ براس ءِ آدگہ درسیں کاروائیاں ءُ پوج ءِ بنجلانی دستیگ کنگ ءَ ھمک جاہ ءَ دیم ءَ بوتگ۔
آئی ءَ گوشتگ کہ شھید کیپٹن میران گل ءِ رھوت کاری ءَ شریں کرد پیلو کرتگ ءُ جنگی بودناکیاں سوئویں سرمچارے بوتگ۔ آ ئی گوں وتی شوربندیاں انچیں مشن سوبین کرتگ کہ گمان کنگ نہ بیتگ۔ شھید میران ءَ گل ءِ مالی کمک ءَ چونیں کرد پیلو کرتگ۔
آئی گوشتگ کہ کنچتی دوراھی ءَ اے میڑ ءَ کیپٹن میران ءُ سنگت آشوپ ءَ وتی آدگہ ھواریں سنگت پہ سلامتی در کرتگ اَنت ءُ وت دژمن ءِ بگیری ءَ داں گڈی ساھت ءَ جنگ کرتگ ءُ آجوئی جھد ءِ گوستانک ءِ تاکدیماں پہ مدامی نمیران بوتگ۔
جارکش ءَ گوشتگ کہ شھید سرمچار شیھک پنام آشوب ء برکت تُربَت ،سرنکن ءِ جھمنند اِنت ءُ پہ بلوچستان ءِ آجوئی ءَ 2024 ءَ بی ایل ایپ ءَ ھوار بوتگ۔
آئی گوشتگ کہ چہ سرڈگار ءِ پھریزگ ءِ جوزگ ءَ آ کوہ ءَ آتکگ ءُ ھیلکاری سرجم کنگ ءَ پد دمگ ءِ نیٹورک ءَ وتی کرد پیلو کرتگ۔ آئی آپریشن بام ءَ ابید بی ایل ایپ ءُ براس ءِ لھتیں گچینیں کاروائیاں بھر زرتگ۔ مند، متسنگ ءَ پوجی چوکی ءِ دستیگ کنگ ءِ وھد ءَ شھید آشوب ءَ شریں کردے پیلو کرتگ۔ آئی گوں وتی سنگتاں نہ تھنا چوکی دستیگ کرتگ ءُ سلاہ برتگ اَنت ءُ دژمن تاوان داتگ۔ آئی مند، تمپ، دشت، گْوادر ءُ تُربَت ءِ جتائیں ھنداں گل ءِ کاراں بھر زرتگ ءُ وتی زمہ واری ءُ توکل ءِ سوب ءَ یک پجارے ءِ واھند بیتگ۔
جارکش ءَ گوشتگ کہ مئے شھیدیں سنگتاں گوں وتی ھوناں ھمے کلوہ داتگ کہ بلوچ راجی ایردستی ءَ نہ من اِین ءُ وتی آجوئی ءِ جھد ءَ ھر ھال ءَ برجاہ دارین ءُ آجوئی ءَ گرین ءُ دم کش ایں۔
جارکش ءَ گوشتگ کہ مرچیگیں اے شھیدی نہ تھنا پما یک چکاسے اَنت بلکیں آجوئی ءِ جوزگ ءُ توکل ءِ یک نوکیں درے۔ شھیدانی ھون مارا ھمے ترانگ ءَ گیج اَنت کہ اے زرمبشت مئے زمہ واری اِنت۔ نوں مئے سر ءَ پرز اِنت کہ ما آیانی مشن ءَ دیم ءَ بہ بریں آیانی لیکہ ءَ زندگ بہ داریں ءُ دژمن ءَ پیش بدار یں کہ شھیدی مئے زرمبشت ءَ نزور نہ کنت بلکیں گیش مھکم کنت۔
جارکش ءَ گوشتگ کہ ما وتی دوئیں شھیدیں سرمچاراں ستک شانی ندر کن ایں۔ آیانی دیمونی مئے زرمبشت ءِ مڈی اَنت، آیانی ترانگ ھر وھد ءَ زندگ بنت۔ آ مئے میان ءَ ساڑی نہ اَنت بلے آیانی توکل آیانی جھد ءُ آیانی دیمونی ھر وھد ءَ مئے دلاں زندگ اَنت۔
میجر گھرام ءَ شھید کیپٹن میران ءُ سنگت آشوب ءَ آیانی گرانبھائیں دیمونیانی سر ءَ ستک شانی ندر کرتگ ءُ گوشتگ کہ ما اے کول ءَ کن ایں کہ شھیدانی کاروان ءَ ھر پیم ءَ گڈی منزل ءَ سر کن ایں۔
