بلوچ وومن پورم ءِ پنچُمی بُنجاھی دیوان بنجاھی سروک ڈاکٹر شلی بلوچ ءِ سروکی ءَ برجم دارگ بوتگ دیوان ءِ بن گپ ڈپٹی آرگنائزر ءِ اھوال ، نگدکاری ،گل کاری ،میان اُستمانی ءُ ھندی سیاسی جاور ھال ءُ آؤکیں گامگیج بوتگ۔
باسکاں تران کرتگ ءَ گوشتگ کہ نگد یک ادارھے ءِ آدینک اِنت ابید ءِ نگد ءَ ھچ ادارہ ءُ شے شری ءِ نیمگ ءَ گام جت نہ کن اَنت ءُ یک سیاسی باسکے ءِ بستار ءَ ما نگد ءِ ارزشت ءُ تاوان ءَ سرپد بہ بئیں کہ نگد ءِ جند چی یے چون ءُ کج ءَ کنگ بیت ، نگد ءِ کنگ ءِ وتی لوٹ ءُ راھبند ھست اَنت کہ اود ءَ ما وتی گپ ءَ ایر کرت کنیں، بزاں گوں ھمکار ءُ وتی راھبند ءَ گپ جنگ بیت۔ یک گپے زھن ءَ بہ بیت کہ وھدے نگد اگاں چہ ھمگرنچیں مردم ءُ راھبند ءَ چہ ڈن بوت گڑا آ گل ءَ تاوان دنت۔
تران کنوکاں گوشتگ کہ انوگیں جاورانی ھساب ءَ نوکیں شوندات ٹھینگ بہ بیت ءُ کار دیم ءَ برگ بہ بنت چوشکہ انوں ریاست گراؤنڈ ءِ سر ءَ ھچ وڑیں سیاسی سُر ءُ پُراں اوپار کنگ ءَ نہ اِنت، ھمک ادارہ کہ سرپیس ءَ کار ءِ کنگ ءِ جھد ءَ کنت گڑا ریاست آ ادارہ ءَ ھچ وڑ ءَ اوپار نہ کنت وڑے نہ وڑے ءَ آئی ءِ دارگ ءِ جھد ءَ کنت یا کہ زندانی کنت ، انوں زوت مئے دیم ءَ یک مزنیں ویلے بوتگ وھدیکہ بی این پی مینگل سردار اتا اللہ مینگل ءِ سالروچ ءَ یک مُچی یے برجم دارگ بوتگ اَت کہ آیانی سر ءَ وت کش تراک کنگ بوت ءُ دومی نیمگ ءَ سیاسی پارٹی این ڈی پی ءُ بی وائی سی ءِ سر ءَ کریک ڈاؤن برجاہ اِنت آیانی بُنجاھی سنگتاں ھوار باسک زندانی اَنت ءُ گوستگیں پنچ ماہ اِنت بی وائی سی ءِ سنگت دروگیں کیسانی نام ءَ ھر پیشی ءَ آ ریمانڈ ءَ دیم دیگ بنت ءُ ماہ جبین گوستگیں سئے ماہ ءَ برز اِنت کہ ریاستی زندانانی تہ ءَ آزار سگگ ءَ اِنت۔ ھارڈ سٹیٹ ءِ متلب ھارڈ سٹیٹ استان انوں ھچ ادارہ ءَ اوپار نہ کنت ھر وڑیں تاوان دنت ۔
آیاں گوشتگ کہ بلوچ چُکچینی چہ دھکاں برجاہ اِنت تھنا جنگ ءُ کشگ ءِ پالیسی مٹ کنگ بیتگ ءُ ترندی آرگ بوتگ ءُ استان ءَ ھندی کشندہ ٹولی گیش ءَ چہ گیش سرگرم کتگ اَنت ، ایشانی سرگرم کنگ ءِ دو پائدہ اَنت پہ استان ءَ یکے ایش اِنت کہ ایش بلوچ اَنت ءُ ادا گراؤنڈ ءَ زان اَنت ھر لوگ ءِ ھال ءَ سرپد اَنت متلب جنوک ھم بلوچے ءُ مِروک ھم بلوچے ھر وڑ ءَ بلوچ مرگ ءَ اِنت، اے جاورانی تہ ءَ ھرچی بلوچ سیاسی گل ءُ نودربر گل ءُ بلوچ یونین کہ ھست اَنت آیاں یکجاہ بوگی اِنت ءُ بلوچ کُش پالیسی ءِ دیم دارگی اِنت ، مئے یکمشتی مارا گیش مھکم کنت ءُ سوبمندی ءِ مانزمان بیت ،مئے بھر ءُ بانگی مارا گیش استانی پندلانی آماچ کنت۔اسٹیک ھولڈر ءُ سیاسی گل ءِ بستار ءَ ما اوشت ءِ آماچ بوت نہ کنیں بلکیں جاورانی رد ءَ شوندات ٹھینگی اِنت ءُ کار دیم ءَ جُنزینگی اَنت۔
آیاں گوشتگ کہ مئے گیشتریں ھیال پہ گل ءِ دیمروئی ءِ سر ءَ بہ بیت۔ پہ ھنکینانی گیش ءَ چہ گیش شر کنگ ءِ ھاتر ءَ ھیلکاری سریزے بندات کنگ بہ بیت ءُ ھنکین گراؤنڈ ءِ رد ءَ جتا جتائیں کار دیگ بہ بنت ءُ رھوت کاری گیش کنگ بہ بیت ، بلوچ زالبول سیاسی پڑ ءَ شیوار ءُ پوہ کنگ بہ بنت دانکہ آ ترند ءَ چہ ترندتریں جاورانی دیمپانی ءَ تیار بہ بنت۔
آیاں گوشتگ کہ بازیں باوست ءُ ڈسکشن ءَ پد آؤکیں گامگیج ءِ تہ ءَ جتائیں پیسلہ زورگ بوتگ۔ گل ءِ گیش شر کنگ ءِ ھاتر ءَ ھیلکاری مراگش ءُ ورکشاپ اڈ دیگ بیت ، گراؤنڈ ریالیٹیزانی بنیاد ءَ ھنکین جتا جتائیں ٹاسک دیگ بنت چوش کہ یک زالبول گلے ءِ بستار ءَ مئے جھد بیت کہ ما ھما کسھاں دنیا ءِ دیم ءَ بیاریں کہ بلوچ زالبول مالی، سیاسی بابت ءَ چے دیمپانی کنگ ءَ اَنت ءُ آ چونیں سکی ءُ سوریانی دیمپان اَنت ایش ءَ ھوار ھما زالبول کہ آ گَھگیری ءِ چیدگ اَنت ءُ آیاں ھر وڑیں کربانی داتگ بلئے مرچی جھان ءَ ھوار بلوچ زالبولاں چہ آیاں نا سرپد اَنت آیانی دلیری ءِ کسہ نبشتھی یا کہ دگہ رنگے ءَ دیما آرگ بنت ءُ بانک کریمہ ءِ پنچمی سال روچ ءِ درگت ءَ جاورانی رد ءَ مراگش ایر کنگ بیت
