بلوچ نیشنل موومنٹ ( بی این ایم ) ءِ چیئرمین ڈاکٹر نسیم بلوچ ءَ جنیوا ءَ ھپتمی میان استمانی بلوچستان کانپرنس ءَ تران کرتگ ءُ گوستانک ءِ مسال داتگ ءُ گوشتگ کہ بلوچستان ءِ گوستانک نوک نہ اِنت بلکیں آئی جتائیں دراجکشیں پجارے ھست۔ آئی وتواکی ءِ گوستانک چہ پاکستان ءَ ساری اِنت۔ بلوچ راج ءِ وتواکی بستار چہ برتانیہ ءِ نوک آبادکاریں سرکار ءُ ھان کلات ءِ بلوچ ریاست ءِ سرکار ءِ میان ءَ کول ءَ ھم منگ بیتگ۔
ڈاکٹر نسیم بلوچ ءَ گوشتگ کہ بلوچ راج ءِ منشا ءَ ابید بلوچستان ءَ چونیں ھم دری باپار یا منسوبہ ءَ موکل نہ دے ایں۔ اے چیز پرک نہ کنت کہ کجام ڈیھ وتی نپانی ھوار کنگ ءِ جھد ءَ اِنت۔ ھندی یا میان استمانی توانمند بہ بنت چونیں ھم ریاستے ءَ ھک نیست کہ مئے منشا ءِ بگیری ءَ مئے سرڈگار ءَ لٹ ءُ پل بہ کنت۔ بلوچستان ءِ مڈی بلوچ راج ئیگ اَنت، ایشانی پیسلہ ءَ ما کن ایں کہ اے چون کارمرز کنگ بہ بنت۔
ڈاکٹر نسیم بلوچ ءَ گوشتگ کہ برتانیہ 1947 ءَ واتر بیتگ گڑا 11 اگست 1947 ءَ بلوچستان ءِ آجوئی ءِ جار جنگ بیتگ، پاکستان چہ ایشی ءَ پد جوڑ بیتگ۔ یک کسانیں وھدے ءَ بلوچستان ءَ یک آجوئیں ریاستے ءِپارست ءَ کار ھم کرتگ۔ آئی وتی پارلیمنٹ، دری پالیسی ءُ سپارتی سرگرمی بیتگ اَنت۔
آئی ءَ گوشتگ کہ پاکستان ءَ 27 مارچ 1948 ءَ بلوچستان ءِ سر ءَ ارش کرتگ ءُ دستیگ کرتگ۔اے زوریں ھوار کنگ ءَ گپ کلات پارلیمٹ ءِ دوئیں ایواناں رد کرتگ۔ اے زوراکی ءِبگیری ءَ زوت گھگیری بندات کنگ بیتگ۔ بلوچاں کدی ھم بلوچ سرڈگار ءِ سر ءَ پاکستان ءَ ٹاپار نہ من اتگ اَنت۔ ما چہ 1948 ءَ اے ھواری ءَ یک زوریں درکانودی کارپدے سرپد بوگ ءَ ایں۔
بی این ایم ءِچیئرمینءَ گوشتگ کہ بلوچستان ءِ سر ءَ پاکستانءَ زورگپتی ءَ پد 1948، 1858، 1962، 1973 ءُ پد ءَ چہ 2000 ءَ گھگیری ءُ آجوئی ءِ جنگ بوگ ءَ اَنت۔ ھمک وھد ءَ پاکستان ءَ پہ آیانی دارگ ءَ زوراکی کرتگ۔ انوگیں دھکاں انسانی ھکانی بگیری گوں ترندی ءَ برجاہ اِنت۔ ایمنسٹی انٹر نیشنل ءُ ھیومن رائٹس واچءَ ھوار آدگہ میان استمانی گلاں زوریں بیگواھی، درکانودی کوش، دزگیری ءُ آزادھی ، مچی مانشجاھانی دست کپگ ءُ پر ایمنیں سیاسی سرگرمیانی پہ دارگ ءَ زووراکیانی رپورٹ داتگ انت۔
