اسلام آباد ءَ پہ بلوچ یکجھتی کمیٹی ءِ سروک ءُ زور بیگواھیں مردمانی آجوئی ءَ برجاھیں زھرشانی نندانک ءَ شست ءُ سے روچ سرجم بیتگ کہ انگت ءَ برجاہ اِنت۔
سانمندیں کھولاں چو مدامی وڑ ءَ مرچی ھم زھرشانی روانکے کش اِتگ ءُ پہ وتی لوٹانی ھک ءَ اوگام جتگ۔
زھرشانی کنوکانی گوشگ اِنت کہ مئے زھرشانی پہ بلوچ یکجھتی کمیٹی ءِ سروک ءُ زور بیگواھیں مردمانی آجوئی ءَ گوستگیں دو ماہ اِنت کہ برجاہ اِنت۔ڈاکٹر ماہ رنگ ءُ بلوچ یکجھتی کمیٹی ءِ سروکانی میار ھمیش اِنت کہ آیاں بلوچستان ءَ ریاستی زوراکیانی بگیری ءَ توار چست کرتگ ءُ جھان ءَ پہ بلوچستان ءِ جیڑہ ءَ دزمانجنی کنگ ءِ لوٹ کرتگ۔
آیاں گوشتگ کہ دانکہ بی وائی سی ءِ سروکاں ھوار بیگواھیں مردم آجو کنگ نہ بنت ءُ بلوچستان ءَ ریاستی زوراکی ھلاس کنگ نہ بنت مئے زرمبشت برجاہ بیت۔
آیاں گوں بلوچستان ءِ آدگہ زور بیگواھیں مردمانی کھولاں لوٹ کرتگ کہ آ بیا اَنت ءُ مئے زھرشانی نندانک ءَ ھوار بہ بنت ءُ پہ ریاستی زوراکیانی بگیری ءَ توار چست بہ کن اَنت۔
