شال ءَ زور بیگواھیں سگیر اھمدءُ اکرار بلوچ ءِ کھول ءِ نیمگءَ زھرشانی کنگ بیتگ کہ زھرشانی ءَ وائس پار بلوچ مسنگ پرسن ءِ چیئرمین نسر اللہ بلوچ ءَ ھوار زور بیگواھیں مردمانی کھول ءُ آدگہ مردماں بازیں کچے ءَ بھر زرتگ۔
زور بیگواھیں سگیر اھمد ءِ گھار ءَ تران کرتگ ءُ گوشتگ کہ منی برات سگیر اھمد ءُ منی ناکو زتک اکرار بلوچ یازدہ جون ءَ چہ اورماڑہ ءَ آوار جنگ ءُ بیگواہ کنگ بیتگ اَنت مارا چہ ریاستی ادارھانی نیمگ ءَ آیانی بابت ءَ ھچ وڑیں ھال نہ رستگ۔ منی برات یک نودربرے بیتگ کہ آئی چہ نوکری نہ رسگ ءِ سوب ءَ تربت ءَ پہ وتی کھول ءِ والینگ ءَ گوں زمباد گاڑی ءَ کار ءَ بیتگ۔
آئی ءَ گوشتگ کہ اکرار بلوچ یک نادراھے ما نزان ایں آئی چیریں آزارجاھاں چے ھال بیت۔ منی برات ءَ اولی رند نہ اِنت آ بیگواہ اِنت چہ ایشی ءَ پیش 2017 ءَ ھم بیگواہ بیتگ ءُ پہ آئی آجوئی ءَ منی گھار ھمیدہ ءَ جھد کرتگ۔
آئی ءَ گوشتگ کہ من ریاست ءَ ھمے جست ءَ کن آں کہ ریاست مات ءِ ھساب ءَ اِنت گڑا اے کجام مات اِنت کہ وتی زھگ ءَ بارت ءُ بیگواہ کنت۔ من چہ سرکار ءَ ھمے لوٹ ءَ کن آں کہ منی برات ءُ ناکو زتک ءَ زوت آجو بہ کنت۔ من گوں سرکار ءَ لوٹ کن آں کہ منی براتاں چونیں میارباری کرتگ گڑا آمیدسگ ءَ پیش کنگ بہ بنت۔
آدگہ مردماں تران کرتگ ءُ گوشتگ کہ چہ زوریں بیگواھی ءَ سرجمیں بلوچستان سانمند اِنت۔ ھمے گس ھمے زوراکی ءِ آماچ اِنت۔ ما پہ وتی آزیزانی آجوئی ءَ داں اسلام آباد ءَ زھرشانی ءَ شتگ ایں مارا ھچ جاہ ءَ انساپ نہ رستگ۔
آیاں گوشتگ کہ ما ھمے لوٹ ءَ کن ایں بلوچستان ءَ زوریں بیگواھی بند کنگ بہ بیت ءُ درسیں بیگواھیں مردم زوت آجو کنگ بہ بنت۔
