بلوچ وومن پورم ءَ وتی شنگ کرتگیں درشانے ءَ گوشتگ کہ بلوچی زبان ءِ مزن نامیں راجی شائر مبارک کازی ءِ نمیرانی ءَ دو سال سرجم بوگ ءَ ما آئی دروت ندر کن ایں۔ آئی نمیرانی ءَ بلوچ لبزانک ءِ پڑا یک انچیں جاھے ھالیگ کرتگ پہ اے جاہ ءِ پُر کنگ ءَ کرن درکار بنت۔ مرچی واجہ مبارک کازی مئے میان ءَ ساڑی نہ اِنت بلے آئی گوں شائری لبزاں کماتگیں گوھریں دانک پہ مدامی رھشونی کن اَنت۔ نمیرانیں مبارک کازی نہ ایوک ءَ یک زبان دوستیں شائرے بلکیں آ گوں شائرے ءَ ھوار یک کاملیں بلوچے اَت۔ مبارک کازی ءَ وتی شائری ءِ تہ ءَ نہ ایوک ءَ زند ءِ زیبائی نازینتگ اَنت بلکیں آئی شائری ءِ تہ ءَ راجدوستی ءِ سکین ءُ راجی ایردستی ءِ درد ءُ تورشت گندگ بنت۔
آئی ءَ گوشتگ کہ نمیرانیں واجہ مبارک کازی ءَ چہ وتی ازم ءِ درانگازی ءَ ھمے پیش داشتگ کہ راجانی تہ ءَ شائرانی پرز ءُ کرد چے بیت۔ آئی ءَ چہ وتی راجدوستی شائری ءِ سوب ءَ لوگ ءِ سر ءَ دستی بمب ارش، زندانی بوگ ءُ دژمنانی بیھار درس دیستگ اَنت بلے چہ وتی راجدوستی ءِ پگر ءُ لیکہ ءَ پد نہ کنز اتگ۔ آئی ءَ وتی شائری ءِ تہ ءَ راجی ورناھان ءَ چہ سلکاریاں درکپگ ءُ راجدوستی ءِ جھد ءِ تہ ءَ ھوار بوگ ءِ سکین داتگ۔ آئی ءَ بلوچ ءِ نیل بومیں زر ءَ بگر دانکہ بلوچستان ءِ ماتکوہ وتی شئیرانی تہ ءَ نازینتگ اَنت۔ واجہ کازی ءَ وتی راجی ایردستی ءِ گم پر بوتگ۔ آئی ءَ بیگواھیں مردمانی مات ءُ چکانی درد مار اتگ اَنت۔ آئی ءَ دژمن ءَ را دژمن گوشتگ ءُ وتی راجی پدریچ پہ گھگیری ءَ سکین داتگ۔
واجہ مبارک کازی نہ ایوک ءَ راجی دردواری ءِ گپ جتگ بلکیں آ ھما شائر بوتگ کہ آ ریاستی زوراکیانی بگیری ءَ بوتگیں زھرشانیانی تہ ءَ ھم پہ گھگیری ءَ گندگ بوتگ۔ نمیرانیں واجہ مبارک کازی ءِ بے مٹیں کرد ءُ ازم پہ بلوچ ورنا ءُ نوکیں ادیباں یک مادنیں کشکے۔
آئی ءَ مبارک کازی بلوچ راج ءِ ھما شائر اِنت کہ آ چہ وتی آشوبی شائری ءِ سوب ءَ زندگی ءَ ھم شرپ دیگ بوتگ آئی ءِ ازم ءُ کرد ءِ سر ءَ جتائیں دیوان ءُ پروگرام برجم دارگ بوتگ اَنت۔ راجدپترانی تہ ءَ ھما شائر ءُ ادیب ابدمان بنت کہ آیانی تہ ءَ راجدوستی پگر گندگ بیت گڑا نمیرانیں واجہ کازی ھما شائر اِنت کہ آئی گوں وتی ازم ءَ انساپ کرتگ ءُ ازم ءِ لوٹانی پیلو کنگ ءِ جھد کرتگ۔
آئی ءَ گوشتگ کہ نمیرانیں مبارک کازی ءِ شائری ءِ آسر اد ءَ نہ کٹ ایت بلکیں نسل داں نسل ءَ روان کنت ءُ آ ھمک دھر ءَ گوں جوانیں دانکاں یاد کنگ بہ بیت۔
