پسنی: یک شمبے ءِ روچ ءَ شپاکو بازار ءِ مزن وانگجاہ ءَ بلوچی زبان ءِ آشوبی لچھکار نمیرانیں مبارک کازی ءِ نام ءَ جنینانی نیمگ ءَ شائری دیوانے برجم دارگ بوتگ۔ دیوان ءَ نودربر ، جنین ءُ زھگاں بازیں کچے ءَ بھر زرتگ۔
دیوان ءِ گچینی مھمان بلوچی زبان ءِ نامداریں شائرمنیر مومن بوتگ۔ دیوانءَ بلوچی زبان ءِ نامداریں شائر میر امر میر، زبیر مکتار، سیاسی ءُ چاگردی کارکن سیٹ شربت، سیول سوسائٹی ءِ سروک پرویز سپر، آزم آزمان ءِ اگدہ دار ساڑی بوتگ اَنت۔
دیوان ءَ ساڑی ئیں مردماں نمیرانیں مبارک کازی ءِ شئیر ونتگ اَنت ءُ آئی زندگی ءُ آزم ءِ سر ءِ وتی ھیال درشان کرتگ اَنت ءُ آئی کرد ساڑاتگ۔
آیاں تران کرتگ ءُ گوشتگ کہ مبارک کازی چہ وتی شائری ءَ راج ءِ راھشونی کرتگ ءُ پہ بلوچی زبان ءِ دیمروئی ءَ مبارک کازی ءِ کرد کدی شموشگ نہ بیت۔
