شال: بیگواھیں بلوچانی توار ( وی بی ایم پی ) ءِ سرکماش نسر اللہ ءَ وتی شنگ کرتگیں درشانے ءَ گوشتگ کہ بلوچستان ءَ پہ زوریں بیگواھی ءِ بگیری ءَ وی بی ایم پی ءِ نیمگ ءَ برجاھیں جھان ءِ تہ ءَ دراجکشین ءُ پرایمنیں زھرشانی گدان شال پریس کلب ءِ دیم ءَ اِنت آئی 5311 روچ سرجم بوتگ۔
آئی ءَ گوشتگ کہ ما چہ گل ءِ نیمگ ءَ گوستگیں پانزہ سال اِنت کہ پہ زور بیگواھیں مردمانی جیڑہ ءَ ڈیھ ءِ کانود ءِ پارست ءَ پرایمن ءُ کانوی جھد کنگ ءَ ایں، مئے لوٹ ھمیش اِنت کہ زور بیگواھیں مردم یل کنگ بہ بنت، اگاں کسے ءِ سر ءَ چونیں بھتامے ھست گڑا دیم ءَ آرگ ءُ آمیدگس ءَ پیش کنگ بہ بیت۔ کجام مردم بیران بوتگ آئی کھول ھال دیگ بہ بیت۔ زور بیگواھیں مردمانی دروگیں میڑاں ناھکیں کوش بند کنگ بہ بیت، کجام ریاست ءِ میاربار اِنت گڑا آمیدگس ءِ رد ءَ سزا دیگ بہ بیت۔
نسر اللہ ءَ گوشتگ کہ ما پہ وتی لوٹاں چنچو سال اِنت پر ایمنیں جھد کنگ ءَ ایں، اے درگت ءَ گل ءَ ھمک دروازگ ٹک اِتگ، اے میان ءَ چنچو سرکار مٹ بوتگ ما درسانی دیم ءَ وتی لوٹ ایر کرتگ اَنت بلے انگت ءَ ھچ وڑیں دلجمیں گامگیج زورگ نہ بوتگ۔ زوریں بیگواھی ءِ جیڑہ ءِ بارو ءَ ریاست ءُ ریاستی ادارھانی سنگین نہ بوگ راجمستری ءُ ڈیھ ءِ کانودانی بگیری اِنت۔ سرکاراں اے زانگ لوٹ ایت زور بیگواھیں مردماں آیاں کھول ھچ وڑ ءَ بے ھال نہ کن اَنت۔ زور بیگواھیں مردمانی کھول پہ وتی آزیزانی آجوئی ءَ چنچو سال اِنت کہ زھرشانی کنگ ءَ اَنت۔
