بلوچ یکجھتی کمیٹی ءَ بلوچستان ءَ آل پارٹیز ءِ پر ایمنیں زھرشانیانی شر ءَ ریاستی زوراکی، آزاردھی ءُ تیرگواری گوں ترندیں دانکاں ایر جتگ اَنت ءُ گوشتگ کہ اے کار جمھوری ءُ انسانی ھکانی تچکیں لگمتالی اِنت۔
آئی ءَ گوشتگ کہ ریاستی ادارھانی بے سوبی ھمک روچ مھلوک ءِ دیم ءَ پاشک بوگ ءَ اِنت۔شال ءِ شھر ءَ ناشرکاری ویل ءَ انتزامیہ درزنانی کچ ءَ بے میاریں مردمانی زندگی ءِ رکینگ ءَ بے سوب بیتگ، وھدے کہ ھمے مھلوک پہ وتی ھکاں زھرشانی کنت گڑا آیانی سر ءَ تیرگواری کنگ بیت ءُ لٹ ءُ کٹ کنگ بنت۔ اے کجام انساپ اِنت کہ مھلوک ناشرکاری ءِ آماچ بیتگ ءُ ریاستی زوراکیانی ھم۔
آئی ءَ گوشتگ کہ بلوچ یکجھتی کمیٹی ءِ کارکن گوستگیں شش ماہ اِنت کہ یکشل ءَ ریاستی زوراکی، بندش ءُ دزگیریانی دیمپان اَنت۔ مرچی بلوچستان ءِ ھمک پارٹی ھمے زوراکیانی آماچ بوگ ءَ اِنت ءُ ھمے راستی پاشک بیتگ کہ اے نزام ءَ جمھوری نہ بلکیں آمریت ءُ مارشلا آرتگ۔ پاکستان ریاست ءُ بلوچستان سرکار ءَ زانگ لوٹ ایت کہ آ بلوچستان ءِ دست ءَ دارگ ءَ بے سوب بیتگ اَنت۔ اے اُستان ءَ مھلوک ءِ زرمبشت ءِ ھلاس کنگ ءِ پالیسی آیاں گیشتر تباھی ءِ نیمگ ءَ بارت۔
آئی ءَ گوشتگ کہ بلوچ یکجھتی کمیٹی گوں درسیں مھلوک ءُ سیاسی پارٹیاں لوٹ کنت کہ اے زوراکیانی بگیری ءَ یکجاہ بہ بنت ءُ توار چست بہ کن اَنت۔ وت مات وت تپاک بہ بہ اِت ءُ گوں مھلوک ءَ بہ اوشت اِت دانکہ زوراکیانی دیم ءَ سرجھل کنگ ءِ جاہ ءَ جھد بہ کن اِت۔ وھد ھمیش اِنت کہ ما درس ھواری لس مھلوک ءِ آشوب ءِ سروکی ءَ بہ کن ایں ءُ ھمے پیش بدار ایں کہ مئے ھکاں چیر ترینت نہ کن اِت۔ مئے درسانی ھواری مئے مستریں زور اِنت۔
