کراچی: پریس کلب ءِ دیم ءَ پہ بیگواھیں مردمانی آجوئی ءَ برجاھیں زھرشانی نندانک ءَ سی ءُ سے روچ سرجم بوتگ۔ اے سکیں گرم ءُ مدام سرکار ءِ نالگوشی ءُ جنجالاں ابید بیگواھیں مردمانی کھول پہ وتی ازیزانی آجوئی ءِ لوٹ ءَ نشتگ اَنت۔
زھرشانی ءَ نشتگیں کھولانی دو مردم چہ ملیر ءَ بیگواھیں بالاچ بلوچ ءُ لیاری کلری ءَ بیگواھیں بابا پلین آجو بوتگ ءُ وتی گس ءَ سر بوتگ اَنت۔ آیانی آجوئی ءَ نندانک ءَ نشتگیں آدگہ کھولانی دلاں یک اوستے ودی کرتگ ءُ آ وشاں بیتگ اَنت ۔ بیگواھیں زاھد بلوچ ءِ پت ابدُلھمید بلوچ ءَ اے درگت ءَ وشی درشان کرتگ ءُ گوشتگ کہ دوئیں ورنایانی آجوئی مارا ھمے دلجمی ءَ دنت کہ آدگہ مردم ھم بے میار اَنت یک روچے الم آجو بنت۔
کھولانی گوشگ اِنت کہ کراچی ءِ جتاھیں ھنداں درزنے ءَ گیش بلوچ ورنا بیگواہ اَنت۔ آیانی تہ ءَ زاھد الی بلوچ، شیراز بلوچ، سیلان بلوچ ، سرپرازبلوچ، رمیز بلوچ، رھیم بکش بلوچ، رھمان بلوچ، چنگیز ءُ آدگہ مردم ھوار اَنت۔ آیانی بابت ءَ انگت ھچ ھال نیست۔
کھولانی گوشگ اِنت کہ زوربیگواھیاں سرجمیں کھول سسائی ءُ مالی جنجالانی دیمپان کرتگ۔ بازیں گساں زھگانی وانگ زوال بوگ ءَ اِنت۔ کماشیں پت ءُ مات وتی ورنائیں زھگانی راھچاری ءَ نادراھیانی آماچ اَنت۔
زھرشانی نندانک ءَ ھواریں سروک ءُ کھولاں گوں سرکار ءَ لوٹ کرتگ کہ ریاستی ادارہ درسیں بیگواھیں ورنایاں زوت آمیدگس ءَ پیش بہ کن اَنت دانکہ آیانی سر ءَ جتگیں بھتام گوش ءُ آجو کنگ بہ بنت۔
آیانی گوشگ دانکہ مئے یک ورنایے بیگواہ اِنت مئے زھرشانی برجاہ بیت۔
