چہ اسلام ءَ برجاھیں زھرشانی نندانک ءَ بی وائی سی ءِ سروک سمی دین ءَ پریس کانپرنس کرتگ ءُ گوشتگ کہ مئے اے کانپرنس ءِ مول نزر بلوچ ءِ زوریں بیگواھی ءِ دیم ءَ آرگ اِنت۔ نزر مری بایو کیمسٹری ءَ ایم پل ءِ نودربرے ءُ کوھلو ءِ جاہ منند اِنت۔ گوستگیں دہ سال بیت کہ شال ءَ نشتگ ءُ نودربر سروکے ءِ بستار ءَ جھد کنگ ءَ پد سالے نیمے بیت کہ بلوچ یکجھتی کمیٹی ءِ کارکن اِنت ءُ پر ایمنیں سیاست کنگ ءَ اِنت۔
آئی ءَ گوشتگ کہ نزر مری مدام پرایمنیں سیاست کرتگ ءُ پہ بلوچستان ءِ پد منتگیں لس مردمانی ھکاں توار چست کرتگ، بلے بژن اِنت کہ آ وت زور بیگواہ کنگ بیتگ۔ آ مدام چہ چیریں ادارھانی کارمندانی نیمگ ءَ ترسینگ بیتگ کہ آ پہ زوریں بیگواھیاں توار چست مہ کنت بلے آ نزور نہ بیتگ ءُ گل ءِ بنیاد ءَ وتی کارانی نیمگ ءَ دلگوش بیتگ۔
آئیءَ گوشتگ کہ نزر مری ءَ 27 اگست ءِ شپ ءَ ھپت ءُ نیم ءَ چہ شال ءِ گولیمار چاراہ ءَ بلال کیپے ءَ سی ٹی ڈی ءُ پولیس کارمنداں درزنانی کچ ءَ مردمانی دیم ءَ آوار جتگءُ بیگواہ کرتگ۔ مرچی آئی زوریں بیگواھی ءَ ھشت روچ گوستگ کہ انگت ءَ آئی بابت ءَ ھچ وڑیں سرپدی دیگ ءَ نہ اَنت۔ کھول ءَ ایپ آئی آر کنگ ءِ جھد کرتگ بلے چو مدامی وڑ ءَ پولیس ءَ مکن کرتگ۔
آئی ءَ گوشتگ کہ نزر مری ءِ زوریں بیگواھی نہ تھنا آئی آجوئی ءِ پلگ ءِ ٹوھیں میارباری یے بلکیں آئی کھول ءَ آزاردھیں ودار دیگ ءُ مچی سزا دیگ ءَ اَنت۔ گوں ایشیءَ ھوار بلوچستان ءِ ھما سیاسی کارکناں آزار دیگ ءَ اَنت کہ آ پر ایمنیں سیاست کنگ ءَ اَنت۔
آئی ءَ گوشتگ کہ زوریں بیگواھی ءِ جیڑہ ءِ گیشءُ گیوار کنگ ءِ تچکیں راہ ھمیش اِنت کہ اے کار میارے لیکگ بہ بیت ءُ زوت بند کنگ بہ بیت ءُ نزر مری ءَ ھوار درسیں زور بیگواھیں مردم آجو کنگ بہ بنت۔
