کیچ: ناسرآباد ءَ پاکستانی پوج ءِ زوراکیانی بگیری ءَ مردماں شھدگ بند کرتگ ءُ زھرشانی کرتگ، زھرشانی ءَ جنین ءُ زھگاں ھوار مردماں بازیں کچے ءَ بھر زرتگ۔
زھرشانی کنوکاں گوشتگ کہ گوستگیں شپ ءَ پاکستانی پوج ءِ کارمنداں ناسرآباد ءَ گسانی سر ءَ بیڑ برتگ ءُ بازیں ورنا آوار جنگ ءَ پد بیگواہ کرتگ اَنت ، آوار جنگ بیتگیں ورنا انگت ءَ دیم ءَ آرگ نہ بیتگ اَنت ءُ اِے بابت ءَ آیانی کھولاں ھم ھچ وڑیں سرپدی دیگ نہ بیتگ۔
زھرشانی بھر زرتگیں جنیناں گوشتگ کہ گسانی سر ءَ بیڑ برگ ءِ میان ءَ پوجیاں مئے گون ءَ زوراکی کرتگ ءُ مارا ترسینتگ۔
آیانی گوشگ اِنت دانکہ مئے بیگواھیں مردم یل کنگ نہ بنت مئے زھرشانی برجاہ بیت۔
