بلوچ لبریشن آرمی ( بی ایل اے ) ءِ جارکش جیھند بلوچ ءَ ماں رسانکدر ءَ وتی شنگ کرتگیں درشانے ءَ گوشتگ کہ بی ایل اے ءِ سرمچاراں زامران ، گورکوپ ، ھرنائی، ھاران ءُ شال ءَ پنچ جتائیں اُرشاں زورگریں پاکستانی پوج ءُ مادنانی لُٹ ءُ پل ءَ ھواریں شرکت نشانگ کرتگ اَنت ، ھمے وڑ ءَ یک چوکی یے ھم دستیگ کرتگ۔
آئی ءَ گوشتگ کہ بی ایل اے ءِ سرمچاراں کیچ ءِ ھند زامران ، آرچنان ءَ پاکستانی پوج ءِ چوکی نزیک ءَ برجاھیں واٹر سپلائی ءَ تراکناکیں شورہ چیر کرتگ اَنت ، سرمچاراں پوج ءِ دو کارمند ھما وھد ءَ نشانگ کرتگ اَنت کہ آ ھمے جاہ ءَ سر بیتگ اَنت ، تراک ءِ آسر ءَ یک کارمندے مرتگ ءُ دومی ٹپی بیتگ۔
جارکش ءَ گوشتگ کہ ھمے وڑ ءَ کیچ ءِ ھند گورکوپ ، جمک ءَ سرمچاراں زورگریں پاکستانی پوج ءِ بمب پٹوکیں کارمند گوں چیر کرتگیں شورھاں نشانگ کرتگ اَنت ، ایشی آسر ءَ یک کارمندے جاھی مرتگ ءُ دگہ یکے سکا ٹپی بیتگ۔
آئی ءَ گوشتگ کہ بی ایل اے ءَ دوشی شال ءِ ھند میاں گنڈی ءِ نزیک ءَ مادن بروکیں گاڑی یے نشانگ کرتگ ءُ مانداشتگ۔
جارکش ءَ گوشتگ کہ بی ایل اے ءِ سرمچاراں ھرنائی ءِ ھند شاھرگ ، کھوسٹ ءَ گیس پلانٹ ءِ سائٹے ءِ سر ءَ اُرش کرتگ ، سرمچاراں گیس ءِ ٹینکر تراکینتگ ءُ تباہ کرتگ اَنت۔
آئی ءَ گوشتگ کہ سرمچاراں دگہ یک کاروائی یے ءَ ھاران ءِ ھند برشونکی ءَ پولیس ءِ چوکی یے دستیگ کرتگ ءُ ساڑی ئیں کارمند دزگیر کنگ ءَ پد یل کرتگ اَنت۔
بی ایل اے ءِ جارکش جیھند بلوچ ءَ درشان ءِ گڈی ءَ اے درسیں کاروائیانی زمہ واری من اتگ۔
