شال: پہ زور بیگواھیں مردمانی پد جنگ ءَ وائس پار بلوچ مسنگ پرسنز ( وی وی بی ایم پی ) ءِ برجاھیں زھرشانی گدان ءَ 5929 روچ سرجم بیتگ۔ دوشمبے ءِ روچ ءَ زور بیگواھیں جنید ھمید ءُ یاسر ھمید ءِ پت ابدلھمید ءُ سگیر اھمد ءِ گھار ءُ اکرا بلوچ ءِ ناکو زتگ ھسیدہ بلوچ زھرشانی گدانءَ آتکگ اَنت۔
ابدُلھمید بلوچ ءَ گوشتگ کہ منی زھگ جنید ھمید چیریں ادارھانی کارمنداں پاری 8 اکتوبر ءَ چہ بھوانی ءَ آوار جتگ ءُ بیگواہ کرتگ ءُ منی آدگہ زھگ یاسر ھمید 11 اکتوبر ءَ چہ کلات ءَ آوار جتگ ءُ بیگواہ کرتگ ءُ آیانی بابت ءَ مارا ھچ وڑیں سرپدی دیگ ءَ نہ اِنت۔
ھسیدہ بلوچ ءَ گوشتگ کہ منی برات سگیر اھمد ءُ ناکو زتک اکرا بلوچ ھمے سال ءِ 11 جون ءَ گوں النجیب بس ءَ چہ تربت ءَ دیم پہ کراچی ءَ سپر ءَ بیتگ اَنت کہ اورماڑہ ءَ پاکستانی پوج ءَ بس داشتگ ءُ چہ مساپرانی دیم ءَ آوار جتگ ءُ بیگواہ کرتگ اَنت انگت ءَ آیانی بابت ءَ مارا ھچ وڑیں سرپدی دیگ نه بیتگ که چہ ایشی ءَ مئے سرجمیں کھول رنجانی دیمپان اِنت۔
نسر اللہ بلوچ ءَ گوں سرکارت ءَ لوٹ کرتگ کہ اگاں جنید ھمید، یاسر ھمید، سگیر اھمد ءُ اکرا بلوچ ءِ سر ءَ چونیں بھتامے ھست گڑا آمیدگس ءَ پیش کنگ بہ بنت۔ اگاں بے میار اَنت گڑا پہ آیانی آجوئی ءَ دلجمی بدے اِت ءُ آیانی کھولاں چہ رنجاں آجو بہ کن اَنت۔
