بلوچ اسٹوڈنٹس ایکشن کمیٹی ءِ بنجاھی پتر ءِ دومی دیوان سرکماش شبیر ءِ سروکی ءَ برجم دارگ بوتگ۔ دو روچی دیوان ءَ مزن کارگشاد ءَ گوستگیں اھوال دیوان ءِ دیم ءَ پیش کنان ءَ شرگداری، گل کاری، ھندی ءُ میان استمانی سیاسی جاورانی سر ءَ گپ ءُ تران ءَ پد آوکیں گامگیج ءِ تہءَ جتائیں سوڑگ زورگ بوتگ اَنت۔
دیوان ءِ اولی روچ ءِ بندات ءَ اولی بنگپ “گوستگیں اھوال” ءِ تہ ءَ گل ءِ سرجمیں اھوال وانگ بوتگ اَنت ءُ کُلیں ھنکینانی کارانی سر ءَ دلجمی ءَ گوں گپ ءُ تران کنگ بوتگ کہ آھانی تہ ءَ ھنکینانی ٹاھینگ ءَ ھوار آھانی سیاسی ھیلکاری دیوان ءُ ایدگہ مراگش: سباء لیٹریری پیسٹیول، بلوچ لٹریسی کیمپئین ءِ مراگش، بلوچستان کتاب کاروان ءُ ایدگہ کُلیں اھوالانی سر ءَ تران کنان ءَ سرجمیں ھنکینانی اھوال چار ءُ ٹپاسگ بوتگ اَنت۔
دیوان ءِ اولی روچ ءِ دومی سرھال “شرگداری” ات کہ آئی ءِ تہ ءَ بنجاھی باسکاں نگدی نگاہ ءَ وتی ھیال درشان کرتگ انت۔ اے درگت ءَ سنگتاں تران کرتگ ءُ گوشتگ کہ سیاسی ادارھانی دیمروئی ءَ شرگداری یک توانمندیں کارے، پمیشکا پہ ما الم اِنت کہ ما مدام وتی ادارہ ءِ میان ءَ شرگداری ءَ مھکم بہ دار ایں۔
سنگتاں ھمے تران دیم ءَ بران ءَ گوْشتگ کہ یک سیاسی جھدکارے ءَ ہر وھد ءَ وت ءَ نگدی نگاہ ءَ چارگی اِنت داں آ وتی سیاسی جھد ءِ سپر ءَ ہر وڑیں درسیاسی رویشتاں وت ءَ رکینت بہ کنت۔ سیاسی کار ءَ را ھما وھداں کہ الم ھوار بیت گڑا توانائیں آسرے دات کنت، بلے کرد اگاں نگدی کالب ءَ کساس کنگ مہ بنت گڑا ستر مزنیں کارے گون بہ بیت آ سیاسی ءُ آشوبی نہ بیت، داں سیاسی ءُ آشوبی مہ بیت چاگرد ءَ مٹی آورت نہ کنت۔
دیوان ءِ اولی روچ گوں ھمے سرھالاں چہ بنجاھی کماش شبیر ءِ موکل ءَ ھلاس کنگ بوتگ ءُ ایدگہ روچ ءَ چہ بنجاھی مزن کارگشاد ءِ نیمگ ءَ دیوان دوبر بندات کنگ بوتگ۔
دیوان ءِ دومی روچ ءَ دیوان ءَ دیم ءَ بران ءَ دیمی بن گپ گل کار بوتگ، اے درگت ءَ بنجاھی زمہ واراں تران کرتگ ءُ گوشتگ کہ دنیا ءِ ایدگہ راجانی ورنایانی گور ءَ راجی سیاست بہ گندے کتابانی تہ ءِ نبشتگیں گپے ءُ آھانی گورءَ راجی جھد راجدپتر ءِ تاکانی بھر اِنت بلے مئے وشبھتی اِنت کہ ما راجی جہد ءِ بھر ایں ءُ چم ء وت گندگ ایں۔ مرچی گل ءَ راجی نودربر گلے ءِ بستار ءَ وت ءَ منارینتگ ءُ نودربرانی وانگی ءُ سیاسی گھبودی ءِ ڈُبہ وتی کوپگاں زُرتگ ءُ پیلو کنگ ءَ اِنت۔ گل ءِ جھد مرچی بلوچستان ءِ گیشتریں جاھاں سراِنت کہ جتا جتائیں مراگاھ اڈ دیگ اِنت ءُ بلوچ چاگرد ءَ زانت ءُ زانشت ءِ نیمگءَ برگ اِنت۔ بلے ھمنچو گل دیم ءَ روان بیت کار ءُ زمہ واری ھم گیش بیان بنت پمیشکا گل ءِ کُلیں باسکاں وتی گل ءِ زمہ واری گیشتر مھکمیں رنگے ءَ جنزینگی اَنت۔
سرھال ءِ آسر ءَ گل ءِ بنجاھی سرکماش شبیر ءَ دیوان ءَ تران کنان ءَ گوْشتگ کہ ما بلوچ نودربرانی وانگی ءُ سیاسی ادارھے ءِ بستار ءَ وتی جھد برجاہ داشتگ کہ آئی ءِ تہ ءَ بلوچ ورنایانی سیاسی ءُ وانگی تربیت ءَ بہ گِر داں زھگانی وانگی تربیت ما وتی کوپگاں زُرتگ۔ ما راجدوستی ءِ پگر ءَ گوں بندوکیں جھدکاریں ءُ یک راجی جوڈشتے ءِ کار ءِ بھریں گڑا مارا پھمگی اِنت کہ مئے کار تھنا وتی جند ءِ سیاسی تربیت کنگ نہ اِنت بلکیں وتی ھواری ءَ راج ءِ تربیت کنگ مئے زمہ داریانی بھر اِنت۔ وتی کش ءُ گوراں ورنایاں گوں وت ھوار کنگ ءُ آھاں بلوچ ءِ مُچانکی مکسد ءِ سرءَ درونت دیگ اِنت۔ مرچی گل ءَ وتی باسک ھمنچو باسما ءُ سیاسی ھوالہ ءَ مھکم کرتگ اَنت کہ آ بلوچستان ءِ ہر کُنڈ ءَ ادارہ ءِ جھگیری ءَ کُت کن اَنت ءُ کنگءَ اَنت۔ ما اے گپ ءَ پہ پھر گوشت کن ایں کہ گل ءِ بنجای سنگتاں بہ گِر داں بنزھی سنگتاں، ھمے سنگتانی جھد ءِ برورد اِنت کہ ادارہ مرچی بلوچستان ءِ ہر میتگ ءُ کُلیں بلوچ مھلوک ءِ تہ ءَ سر بیتگ۔ ھمے باسمائیں آشوبی جھد ءِ پد ءَ بلوچ چاگرد ءِ تہ ءَ سیاسی ءُ شھوری جھد روچ پہ روچ مھکم تِر بیان اِنت۔ بلوچ ورنا وتی کش ءُ گور ءِ سیاسی جاوراں پھمگءَ پد وتی یک گچینیں لٹریچرے وانگ ءِ نیمگ ءَ برونت داں آھاں راجی جوڈشت ءِ کار ءَ کمک بہ رسیت ءُ وتی چاگرد ءَ توانائیں راجی بیانیہ ءَ جوڑ کُت بہ کن اَنت۔
گل کاری ءَ پد ھندی ءُ میان استمانی سرھال ءِ سرءَ دیوان ءِ سنگتاں تران کنان ءَ گوْشتگ کہ مرچی بلوچ راج ءِ راجی جُنز دگنیا ءِ ایدگہ لگتمالیں راجانی واستہ امیت ءِ چیدگ جوڑ بیتگ۔ ھمے سیاسی چِست ءُ ایرانی برورد ءَ بلوچ چاگرد ءِ تہ ءَ گھگیری ءَ نوکیں جانے رستگ کہ بلوچ ورنا ءُ زالبولاں بہ گر داں زھگ ءُ کماش مرچی چہ راجی باسمائی ءَ بلد اَنت۔ سیاسی چِست ءُ ایرانی برجاہ دارگ ءِ بگیری ءَ وڑ وڑیں پندل سازگ بیت بلے مارا زانگی اِنت کہ اے سیاسی کار ءِ چنچوکیں ارزشتے ھست ءُ اے کار گیش مھکمیں رنگے ءَ برجاہ دارگی اِنت۔
میان استمانی جاورانی سر ءَ سنگتاں گوشتگ کہ استمانی سیاست ءِ تہ ءَ مرچی جتائیں ٹولی جوڑ بیگ ءَ اَنت ءُ دنیا چہ دو بلاک ءَ درتکگ ءُ باز بلاک ءِ تہ ءَ پُترتگ کہ جتائیں ڈیھ پہ وتی راجی نپاں جتائیں اتھادانی بھر بیگءَ اَنت۔ بلوچ ورنایاں وتی کش ءُ گور ءِ میان استمانی سیاسی چِست ءُ ایر نہ تھنا پھمگی اَنت بلکیں آھانی سر ءَ تجزیہ کنگ ءِ نگاھے ھم دارگی اِنت۔
بنجاھی دیوان ءِ دومی روچ ءِ گڈی بنگپ آوکیں گامگیج بوتگ کہ آئی ءِ تہ ءَ گل کارانی سرءَ داتگیں شور ءُ سلاھانی سر ءَ دلجمی ءَ گوں گپ ءُ تران بیت ءُ آوکیں وھد ءَ جتائیں سوڑگ زورگ بوتگ انت کہ آھانی تہ ءَ آوکیں ماتی زبانانی میان استمانی روچ ءَ مبارک کازی ءِ نام ءَ ندْر کنان ءَ آئی ءِ یات ءَ ماں پسنی ءَ مراگاھے اڈ دیگ، ماتی زبانانی روچ ءَ زبان ءِ سرءَ کتابُکے شِنگ کنگ، پہ زھگاں گام کلاس اڈ دیگ، شال ءُ نسیرآباد ءَ سباء لٹریری پیسٹیول اڈ دیگ، دو مارچ بلوچ دود ءُ ربیدگی روچ ءِ سر ءَ مراگش اڈ دیگ، بلوچ لٹریسی کیمپئن ءَ گیش مھکم کنان ءَ سائنسی مراگاہ اڈ دیگ ءُ وھد وھد ءِ سرءَ بلوچستان ءِ وانگی جیڑھانی سرءَ اھوال شِنگ کنگ، بلوچستان کتاب کاروان ءَ گیش شِنگ کنگ ءُ بلوچستان ءِ کُنڈکُنڈ ءَ سرکنگ، گام ءُ نوْشت تاکانی زوت چاپ ءُ شِنگ کنگ ءَ ھوار ایدگہ کسان مزنیںسوڑگ زورگ بوتگ اَنت۔
کُلیں بنگپانی سرءَ تران کنان ءَ آوکیں گامگیج ءِ تہ ءَ سوڑگ زورگ ءَ پد دیوان دومی روچ ءَ چہ سرکماش ءِ موکل ءَ آسر کنگ بوتگ۔
