شال/جاھو: پاکستانی پوج ءَ یک مردمے آوار جتگ ءُ چہ پاکستانی پوج ءِ چیریں آزارجاھاں بیگواھیں مردمے آجو بوتگ۔
اھوالکار ءِ رد ءَ شال ءِ ھند گیس کالونی سریاب کسٹم ءَ پاکستانی پوج ءُ چیریں ادارھانی کارمنداں گسے ءَ بیڑ برتگ ءُ زھری ءِ جھمنندیں انایت اللہ آوار جتگ ءُ بیگواہ کرتگ۔
آئی بیگواھی ءِ گپ آئی برات ازت اللہ ءَ راست کرتگ ءُ گوشتگ کہ 27 اگست ءِ شپ ءَ پاکستانی پوج ءُ چیریں ادارھانی کارمنداں منی برات آوار جتگ ءُ گوں وت برتگ۔
ازت اللہ ءَ گوشتگ کہ منی برات پیسر ءَ ھم یکبرے پاکستانی پوج ءَ بیگواہ کرتگ اَت ءُ پد ءَ آجو بوتگ۔
ازت اللہ ءَ گوں سیاسی ءُ انسانی ھکانی گلاں لوٹ کرتگ کہ آ پہ منی برات ءِ آجوئی ءَ توار چست بہ کن اَنت ءُ آئی آجو کنائینگ ءَ وتی کرد ءَ پیلو بہ کن اَنت۔
دومی نیمگ ءَ چہ جاھو ءَ پاکستانی پوج ءِ دست ءَ بیگواہ کرتگیں میران بلوچ ء ابراھیم آجو بوتگ۔
آجو بوتگیں میران بارگیں گزی ءِ جھمنند اِنت ءُ 28 اگست ءِ شپ ءَ پاکستانی پوج ءَ آوار جتگ ءُ بیگواہ کرتگ اَت۔مرچی آجو بوتگ ءُ وتی گس ءَ سر بوتگ۔
