بلوچ لبریشن آرمی ( بی ایل اے ) ءِ جارکش جیئند بلوچ ءَ ماں رسانکدر ءَ وتی شنگ کرتگیں درشانے ءَ گوشتگ که بی ایل اے ءِ سرمچاراں پنجگور ، کچھی ، شال ، جیمڑی ، ھاران ، بلیده ءُ دالبندین ءَ ھشت جتائیں اُرشاں زورگریں پاکستانی پوج ءُ آئی ءِ چریک نشانگ کرتگ اَنت ، اے اُرشاں پاکستانی پوج ءِ راشن بروکیں گاڑi تباه کرتگ اَنت ءُ پولیس کارمندانی سلاه پُل اِتگ اَنت۔
آئی ءَ گوشتگ که بی ایل اے ءِ سرمچاراں گوستگیں روچ ءَ پنجگور ءِ ھند پروم ءَ زورگریں پاکستانی پوج ءِ گاڑی یے گوں چیر کرتگیں شورھاں نشانگ کرتگ ، تراک ءِ آسر ءَ زورگرین پوج ءِ شش کارمند جاھی مرتگ ءُ گاڑی سرجم ءَ تباه بیتگ۔
جارکش ءَ گوشتگ که پروم ءَ لھتیں مردم پاکستانی پوج ءَ راشن سر کنگ ءَ ھوار اِنت ، ما آیاں بلوچ بوگ ءِ سوب ءَ گڈی رند ءَ کڈن کن ایں که آ چه اے کار ءَ پھریز به کن اَنت ءُ وت ءَ چه کشنده ٹولی ءَ دور به دار اَنت چے ءَ که سرمچار آیاں ھمک وھد ءَ نشانگ کت کن اَنت۔
آئی ءَ گوشتگ که بی ایل اے ءِ سرمچاراں دگه یک کارے ءَ کچھی ءِ ھند کولپور ءَ زورگریں پوج ءِ بمب پٹوکیں کارمند وھدے که ریل ٹریک ءِ راه ءَ بمب درگیجگ ءَ بیتگ اَنت گوں چیر کرتگیں شورھاں نشانگ کرتگ اَنت ، تراک ءِ آسر ءَ یک کارمندے جاھی مرتگ۔
بی ایل اے ءِ جارکش ءَ دیمتر ءَ گوشتگ که همے روچ ءَ سرمچاراں کولپور ءَ پاکستانی پوج ءِ دگه یک گاڑی یے ھم نشانگ کرتگ که آئی ءَ جانی ءُ مالی تاوان بیتگ۔
آئی ءَ گوشتگ که سرمچاراں شال ءِ ھند میاں گنڈی ءَ زورگریں پاکستان ءِ پولیس کارمند دزگیر کرتگ اَنت ، سرمچاراں پولیس کارمندانی سلاه گپتگ اَنت که آیانی ته ءَ سے سی تیر ( کلاشنکوپ ) ھوار اِنت ، چوش که آ بلوچ راج ءِ سر ءَ زوراکیاں ھوار نه بیتگ اَنت ھمے سوب ءَ کڈن کنگ ءَ پد یل کتگ اَنت۔
جارکش ءَ گوشتگ که بی ایل اے ءِ سرمچاراں پنچ شمبے ءِ شپ ءَ گوادر ءِ شھر جیمڑی ءَ پاکستانی پوج ءِ بندری بنجل ءِ سر ءَ گوں دستی بمب ارش کرتگ ، ایشی آسر ءَ پوج ءَ تاوان بیتگ۔
آئی ءَ گوشتگ که ھمے وڑ ءَ 21 اگست ءَ ھاران ء ھند گواش ءَ زورگریں پوج ء چریک منیر تیرگواری کرتگ ءُ کشتگ ، کشگ بیتگیں چریک په پاکستانی پوج ءُ چیریں ادارھاں چاریگے ءَ بیتگ۔
آئی ءَ گوشتگ که بی ایل اے ءِ سرمچاراں 23 اگست ءَ بلیده ، کوچگ ءَ په پاکستانی پوج ءَ راشن بروکیں سے ٹرک ءُ یک کرین گاڑی یے مانداشتگ ءُ تباه کرتگ۔
جارکش ءَ گوشتگ که 23 اگست ءَ سرمچاراں چاگی ءِ ھند دالبندین ءَ مادن بروکیں دو گاڑی ھم مانداشتگ ءُ تباه کرتگ۔
بی ایل اے ءِ جارکش جیئند بلوچ ءَ درشان گڈی ءَ اے درسیں کاروائیانی زمه واری من اتگ۔
