بلوچ نیشنل موومنٹ ( بی این ایم ) ءِ کارگشاد دل مراد بلوچ ءَ نواب اکبر ھان بگٹی ءِ شھیدی ءِ نوزدھمی سالروچ ءِ درگت ءَ آئیءَ دروت ندر کرتگ ءُ گوشتگ کہ نواب اکبر ھان بگٹی نہ تھنا یک ٹکی ءُ سیاسی سروکے بیتگ بلکیں مھکمیں سیاستدان، سکا پٹ ءُ پول کنوکیں دانشور ءُ جھدکاریں انسان ءُ روکپت ءُ رو درآتکی لبزانک ءِ زانوگر ءُ بلوچی کلاسیک شائری ءِ دوست داروک بیتگ۔
دل مراد بلوچ ءَ گوشتگ کہ نواب بگٹی ءِ سیاسی زندگی ءِ پٹ ءُ پول مارا ھمے پیش دار ایت کہ آئی ءَ بنداتءَ پاکستان ءِ گون ءَ ھمدپیں سیاست کرتگ۔ ھمے اوست ءَ ریاست ءِ بھر بیتگ ءُ جھد کرتگ کہ بلوچانی ھک، مڈی، شرپ ءُ گیش ءَ چہ گیش وتواکی ءَ بہ پھریز ایت بلے پاکستان ءَ گوں آئی ھما وڑ کرتگ کہ یک نوک آبادکارے گوں وتی ایردست ءَ کنت۔ ریاست ءَ آئی ھمک جھد گوں شک ءُ بے بیسھی ءَ چار اتگ ءُ ھمے پیش داشتگ کہ نوک آبادکاریں توان ءِ کِر ءَ نزیکی یا گھگیری دوئیں بے نپ اَنت چی ءَ کہ نوک آبادکار ءِ بنکی مول راجانی دیمروئی نہ اِنت بلکیں آیانی سرڈگارءُ مڈیانی لٹ ءُ پل اِنت پاکستان ءَ ھمے کار کرتگ۔
آئی ءَ گوشتگ کہ نواب اکبر ھان بگٹی ءَ دیستگ کہ پاکستان نزیکی ءِ زبان ءَ سرپد نہ بیتءُ چہ وتی لشکری تونگری ءَ ھمک نزیکی ءِ لپاشگ ءِ شوربندی ءِ سرءَ کار ءَ اِنت گڑا آئی وتی بازیں نادرائی ءُ پیری نہ چارتگ نوک آباد کاریں نزام ءِ دیم پہ دیمی کنگ ءِ پیسلہ کرتگ۔
دل مراد بلوچ ءَ گوشتگ کہ پاکستانی پوج ءَ زور کارگپتگ ءُ کماش ءُ نادرائیں سروک شھید کرتگ۔ اے گامگیج آئی نوک آبادکاریں سساءَ تچک ءَ پیش دار ایت۔ آئی ھون بلوچ سرڈگار ءِ سر ءَ رتکگ اَنت آیاں بلوچ راجی زرمبشت ءَرا یک نوکیں زندے بکش اتگ ءُ پہ بلوچ راج ءَ یک جارے بیتگ کہ نوک آبادکار ءِ زورءِ دارگ ءِ گھگیری اِنت۔
دل مراد بلوچ ءَ گوشتگ کہ نواب بگٹی ءِ گون ءَ بوتگیں رویشت بلوچ ءِ ٹپانی سر ءَ واد پریچگ اِنت۔ریاست ءَ نہ تھنا آئی زندگی ءَ بلکیں شھیدی ءَ پد ھم انسانی شرپ ءَ زبھر نوک آبادکاری زور پیش داشتگ، نواب اکبر ھان ءِ لاش ءِ کمشرپ کنگ ءِ جھد کرتگ، بلے ریاست ءِ اے ناشرکاری ءَ بلوچ زانشت گیشتر ودینتگ ءُ مارشت گیش کرتگ کہ ایردستیں راج ءِ ازت، شرپ ءُ پدریچ نوک آبادکاریں نزام ءِ دیم ءَ سر جھل نہ کن اَنت بلکیں تھنا وتی راجی آجوئی ءَ لوٹ اَنت۔ھمے سوب اِنت کہ مرچی ھمک بلوچ ورنا نواب بگٹی ءِ دیمونیاں پہ وتی وشیں باندات ءَ چار ایت۔
آئی ءَ گوشتگ کہ نواب بگٹی ءِ شھیدی تھنا یک مردمے ءِ مرگ نہ اِنت بلکیں نوک آبادکاری ءِ بگیری ءَ یک اھدے ءِ بندات اِنت۔ اے اھد داں ھما وھد ءَ برجاہ بیت دانکہ بلوچ وتی سرڈگار ءِ سر ءَ آجو، وتواک ءُ شرپ ءِ زندگی یے مہ گوازین ایت۔ نواب اکبر ھان بگٹی ءِ یات ءُ آئی کرد بلوچ راجی زرمبشت ءَ ھمک گام ءَ ھمراہ بیت ءُ زندگ مان ایت۔
