بلوچستان لبریشن پرنٹ (بی ایل ایپ) ءِ جارکش میجر گھرام ءَ ماں رسانکدر ءَ وتی شنگ کُرتگیں درشانے ءَ گْوشتگ کہ بلوچستان ءَ راجی آجوئی ءِ جُھد برجاہ اِنت ءُ اے جُھد مئے وتی گْوستانکی جنگ اِنت۔اے آجوئی ءِ زْرمبشت ءَ ھپتاد ءُ پنچ سال اِنت کہ یکشل ءَ برجاہ اِنت۔ما بلوچاں مدام چہ جھانی توانمنداں لوٹ کُرتگ کہ پاکستان یک ناشرکارے ءُ ناشرکارانی کمک کنوک ءُ ناشرکاری ءِ بنجل اِنت،پمشکا شُما بلوچ، پاکستان ءِ جیڑہ ءَ دزمانجنجی بہ کن اِت ءُ بلوچ راجی آجوئی زْرمبشت ءَ اکلاکی،سپارتی ءُ مالی کمک بہ کن اَنت۔بلے بژن کہ جھان ءِ دُرسیں توانمند،آجوئی ءُ راجمستری واکدار امریکا ءَ یک ناھکیں گامگیجے زُرتگ گوں پاکستان ءِ ھواری ءَ زورگیپتیں بلوچستان ءِ گرانھادیں مڈیانی لُٹ ءُ پُل کنگ ءِ مسام بندگ ءِ شور کُرتگ۔
آئی ءَ گْوشتگ کہ اے نوکیں گپے نہ اِنت،چہ ایشی ءَ پیش چین ءَ ھم گوادر ڈیپ سی پورٹ، سی پیک روٹ ءُ بلوچ مڈیانی لُٹ ءُ پُل ءَ مُسام بستگ کہ پہ ایشی ءَ بلوچ جنگ کنگ ءَ اَنت۔چین ءَ وتی لُٹ ءُ پُل ءِ لوٹ ءُ واھگانی پاسداری کنگ ءَ بلوچ راج ناشرکار ءُ آجوئی زْرمبشت ناشرکاری گْوشتگ بلے راستی اِش اِنت کہ بلوچ ناشرکار نہ اَنت بلکیں وتی سرڈگار ءُ مڈیانی پھریزگ ءَ آجوئی ءِ جنگے کنگ ءَ اَنت، آجوئی لوٹوک اَنت۔ کئے مارا کجام نام ءَ دنت چہ ایشی ءَ پہ ما مئے راجی ھستمان،پجار ءُ آجوئی گیشتِر بستار دار ایت، آدگہ دُرس ھنچائیں گپ اَنت،مئے نِز ءَ امریکا ءِ اے شور یک مزنیں ناھکی یے۔
آئی ءَ گْوشتگ کہ بلوچ راجی آجوئی جنگ دگہ راج ءُ زمین یا مڈیانی گِرگ ءُ پہ وتی پارسا کنگ ءَ نہ اِنت بلکیں سرجمیں بلوچ راج ءِ واھگ، چہ ایردستی ءِ زبھرے،وتواکی ءُ آجوئی ءِ گِرگ ءِ جُھد اِنت۔
میجر گھرام ءَ گْوشتگ کہ پاکستان ءِ لشکری سروگان کہ گندگ ءَ وت ءَ امریکہ ءِ دوست پیشدار اَنت بلے راستی دگرے۔امریکا وت شری ءَ زانت کہ پندل باز ءُ دو دیم اَنت۔ھنچوش کہ امریکا ءِ سدر ڈونلڈ ٹرمپ ءَ 2016 ءَ وت پاکستان ءِ دو دیمی ءِ باروا تچکی ءَ گْوشتگ اَت ءُ کمک بند کُرتگ اَت۔ نوں ھمے دو دیمیں پاکستان ءِ لشکری سروگان آرمی چیپ جنرل آسِم منیر ءَ بلوچستان ءِ مڈیانی لَڈ امریکا ءِ دیم ءَ ایر کُرتگ۔ ما مُدام گْوشتگ کہ ھرکس بلوچستان ءَ کیت،ما وتی مڈی،تیل،گیس ءُ تیاب ءَ پھریزیں۔ اگاں ھرکس دزمانجنی بہ کنت ءُ بلوچستان ءِ مڈیانی لُٹ ءُ پُل ءَ پاکستان ءِ کمک ءَ بہ کنت ءُ شریدار بہ بیت گڑا بلوچستان پہ آئی ءَ جنجالے جوڑ بیت ءُ آ وت ھمے جنجال ءِ تہ ءَ مان گیش ایت۔پہ درور چین پدر اِنت کہ مول ءُ مُراد گوادر ءُ سی پیک ءِ باروا بے سوب بیگ ءَ اَنت۔
آئی ءَ گْوشتگ کہ ڈاکٹر مالک ءِ درشان اے گپ ءِ منانک اِنت کہ گوادر بالی پٹ پہ لشکری مول ءُ مُرادانی پُژدر ءَ جوڑ کنگ بیتگ۔بلے بلوچ جنگ ءِ سْوب ءَ سالانی سال گْوستگ اَنت بلے چین وتی مول ءُ مرادانی آسر کنگ ءَ سوبین نہ بیت۔ ما چہ سئودی اَرب ءَ ھم دزبندی کن ایں کہ بلوچستان ءَ کاروبار مہ کن، کہ چہ ھزاراں سالاں ما شُما نزیکیں اے نزیکی ءَ زوال مہ کن۔ھمے وڑ ءَ ما چہ مزن ھور ءِ ھاکماں دزبندی کن ایں کہ بلوچانی دلسیاہ کنگ ءَ بند بہ کن، چے ءَ کہ تو شری ءَ زان ئے کہ شُمئے ءُ پنجاب ءِ دوستی ءَ ھپتاد ءُ پنچ سال اِنت ءُ مئے شُمئے نزیکی گوں ھزاراں سالاں بندوک اِنت۔
بی ایل ایپ ءِ جارکش ءَ گْوشتگ کہ بلوچ راج ءَ پہ وتی آجوئی ءِ جنگ ءَ ،ھمساھگیں ڈیھ ءُ جھانی توانمنداں ھوار چہ جھان ءِ آدگہ راجانی نیمگ ءَ پلہ مرزی،مالی ءُ لشکری کمک درکار اِنت، بلے کَس ءَ اے ھک نیست کہ مارا بہ گْوش ایت کدی جنگ ءَ بند کن اِت ءُ کدی بندات ئِے بہ کن اِت۔ مرچی بلوچستان ءَ بلوچ راج ءِ چُکچینی کنگ بیگ ءَ اِنت۔ھنچیں وئیل ھم بیتگ کہ چہ یکیں لوگ ءَ پانزہ مردم کُشگ بیتگ،شپانک کشگ بیتگ، لس مردم لشکری بنجلاں لوٹائینگ ءُ پہ زور کارگرگ بنت، مئے رھدربر (ٹیچر)، واندہ،زانوگر ءُ نودربر چہ زانشجاھاں آوار جنگ ءُ بیگواہ کنگ بنت۔ھنوں زوت یک اھوالکارے گوں زھگاں ھوار یازدہ مردم شھید کنگ بیتگ۔ایشانی میار بَس ھمے بیتگ کہ بلوچ بیتگ اَنت۔ بلوچستان ءِ دمگ مرچی سرجم ءَ یک جنگی پِڑے جوڑ بیتگ۔
آئی ءَ گْوشتگ کہ ما یکبرے پد ءَ چہ جھان ءِ توانمنداں دزبندی کن ایں کہ آ بلوچستان ءِ جیڑہ ءَ دلگوش گْور بہ کن اَنت ءُ پنجابی ریاست ءِ ناشرکاری ءُ زوراکیاں گِر ءُ دار بہ کن اَنت۔اگاں اے کار ءَ آ سوبین نہ بنت گڑا کم چہ کم مئے مڈیانی لُٹگ ءِ جُھد ءَ شریدار مہ بنت، چے ءَ کہ ھرکس اے کار ءَ بہ کنت،آ وتی تاوان ءِ زمہ وار وت بیت۔
آئی ءَ گْوشتگ کہ ما پمشکا یکبرے پد ءَ جھان ءِ توانمند، تیوک ءَ امریکا،برتانیا،پرانس،جرمنی ءُ چین ءَ گْوشگ لوٹ ایں کہ نہ اے جاپان اِنت،نہ آئرلینڈ اِنت ءُ نہ کہ دگہ دمگے،اے بلوچستان اِنت ءُ اے زمین پہ بدواھاں ھنچو ناگیگ ءُ جنجالے بلوچ ءِ گھگیری دو ھمنچک اِنت۔
میجر گھرام ءَ وتی دزشان ءِ گُڈی ءَ گْوشتگ کہ ما دزبندیں کن ایں کہ شُما بلوچ راجی جیڑہ ءِ گیش ءُ گیوار کنگ ءَ دیم ءَ بیا اِت، بلے بزان اِت کہ بلوچ ءِ جیڑہ پاکستان ءِ تھی جیڑہ نہ اِنت۔
