اسلام آباد ءَ پہ بلوچ یکجھتی کمیٹی ءِ سروک ءُ زور بیگواھیں مردمانی آجوئی ءَ برجاھیں زھرشانی ءَ چل ءُ یک روچ سرجم بیتگ کہ انگت ءَ برجاہ اِنت۔ زھرشانی ءَ چل روچ ءِ گوزگ ءَ ابید چہ سرکار ءِ نیمگ ءَ پہ آیانی لوٹانی گوش دارگ ءَ ھچ وڑیں دلجمیں گامگیج زورگ نہ بیتگ۔
اے بابت ءَ زھرشانی کنوکیں مردمانی گوشگ اِنت کہ مئے اے برجاھیں زھرشانی آئی دودیمیں نزام ءَ پاشک کنگ ءَ اِنت۔
آیاں گوشتگ کہ بلوچ راج ءَ اے گپ شموشگی نہ اِنت بلوچ ءِ یک جنکے ماہ جبین بلوچ مرچی ھما ریاست ءِ چیریں آزارجاھاں بندیگ اِنت ءُ آئی بابت ءَ ھچ وڑیں سرپد دیگ بوگ ءَ نہ اِنت۔
آیانی گوشگ اِنت کہ مرچی بلوچ یکجھتی کمیٹی ءِ سروک ھم پہ سیاسی جھد ءِ پژدر ءَ زنداناں بندیگ کنگ بیتگ اَنت۔ چی ءَ کہ بلوچ یکجھتی کمیٹی ءِ سروکاں ریاستی زوراکیانی بگیری ءَ توار چست کرتگ ءُ بلوچستان ءَ گوں لس مردماں ناھکی نہ منّ اتگ۔
آیاں گوشتگ کہ ایشی یک منانکے ھمیش اِنت مرچی پہ ریاستی زوراکیانی بگیری ءَ مارا اد ءَ اسلام آباد ءَ پر ایمنیں زھرشانی کنگ ءِ ھک دیگ بوگ ءَ نہ اِنت۔ بلے ما ریاست ءَ ھمے گوشگ لوٹ ایں دانکہ مئے مردم آجو نہ بیتگ اَنت مئے زھرشانی برجاہ بیت۔
