کراچی بار ایسوسی ایشن ءِ سدر ایڈوکیٹ آمر وڑائچ گوں زاھد بگٹی ءُ کے بی بلوچ ءَ ھوار کراچی پریس کلب ءِ دیم ءَ زاھد بلوچ ءِ کھول ءِ زھرشانی نندانک ءَ اتکگ ءُ بیگواھیں زاھد بلوچ ءُ سرپراز بلوچ کھول ءِ گون ءَ گند ءُ نند کرتگ ءُ یکجھتی درشان کرتگ۔
ایڈووکیٹ آمر وڑائچ ءَ تران کرتگ ءُ گوشتگ کہ کراچی بار ایسوسی ایشن زوربیگواھی ءَ یک ٹوھیں میارے لیک ایت ءُ اے ریاستی زوراکی ءِ درچ اِنت۔
آئی گوشتگ کہ چونیں ھم شھری یے ءِ بیگواہ کنگ رھبند ءُ کانود ءِ بگیری اِنت۔ اگاں کسے ءِ سر ءَ بھتام ھست گڑا آ آمیدگس ءَ پیش کنگ بہ بیت۔ چی ءَ کہ سزا دیگ آمیدگس ءِدست ءَ اِنت بلکیں بے میاریں مردمانی بیگواہ کنگ انسانی ھکانی لگت مالی انت۔
ایڈووکیٹ آمر وڑائچ ءَ بلوچ، سندی، پشتوناں ھوار درسیں بیگواھیں مردمانی آجوئی لوٹ کرتگ۔
چوش کہ زور بیگواھیں زاھد بلوچ ءِ کھول ءِ زھرشانی ءَ مرچی ھژدہ روچ اِنت کہ کراچی پریس کلب ءِ دیم ءَ برجاہ اِنت۔ زاھد بلوچ ءَ 17 جولائی 2025 ءَ چہ کراچی ءِ ھند گولیمار ءَ پاکستانی چیریں ادارھاں آوار جتگ ءُ بیگواہ کرتگ۔
زور بیگواھیں سرپراز بلوچ 26 پروری 2025 ءَپاکستانی چیریں ادارھانی کارمنداں آوار جتگ ءُ بیگواہ کرتگ۔
