شال: پاکستانی پوج ءِ دست ءَ بیگواھیں سگیر اھمد ءِ گھارنسیدہ بلوچ ءَ شال ءَ چہ وی بی ایم پی ءِ گدان ءَ پریس کانپرنس کرتگ ءُ گوشتگ کہ یازدہ جون 2025 ءِشپ ءَ منی برات سگیر اھمد ءُ ناکو زتک اکرار بلوچ چہ اورماڑہ ءَ آوار جنگ بیتگ اَنت۔ مرچی آیانی بیگواھی ءَ دو ماہ ءَ گوستگ نہ آیانی بیگواھی ارزی پولیس تانہ ءَ نبیسگ بوتگ ءُ نہ آمیدگس ءَ پیش کنگ بوتگ اَنت ، انگت ءَ چہ ریاستی ادارھانی نیمگ ءَ مارا ھچ وڑیں ھال دیگ نہ بوتگ۔
آئی گوشتگ کہ چہ ایشی ءَ پیش منی برات 20 نومبر 2017 ءَ ھم چہ کراچی زانشجاہ ءَ آوار جنگ ءُ بیگواہ کنگ بوتگ اَت۔ داں یک سالے ءَ آزار دیگ بوتگ اَت۔ سگیر اھمد یک وانندگیں ورنایے کراچی زانشجاہ ءُ سرگودھا زانشجاہ ءَ وانگ ءِ سرجم کنگ ءَ پد آ وتی ھنکین آواران ءَ واتر آتکگ دانکہ مردمانی کمک ءَ کرت بہ کنت۔بلے کار ءِ نہ رسگ ءِ سوب ءَ آ تُربت ءَ شُتگ ءُ وتی ناکوزتک اکرار بلوچ ءَ ھوار مزدوری کرتگ۔ آئی میار ھمیش اِنت کہ آئی کار کرتگ ءُ گس والینتگ ءُ بلوچے بوتگ۔اگاں سگیر یا اکرار بلوچ ءِ سر ءَ بھتام ھست گڑا آ آمیدگس ءَ پیش بہ بنت ءُ کانود ءِ رد ءَ آیانی سر ءَ کیس کنگ بہ بیت۔
نسیدہ بلوچ ءَ گوشتگ کہ آمیدگس بے توار بہ بنت، رسانکدر دلگوش مہ دنت گڑا یک لاچاریں گھارے کج ءَ بہ روت؟ وھدے کہ ریاست وت گوں وتی شھریاں زوراکی بہ کنت گڑا ما کئی در ءَ بہ ٹُک ایں؟ بے تواری یک میارے ءُ ما بے توار بوت نہ کن ایں۔
آئی گوشتگ کہ من گوں مزن آمیدگس، انسانی ھکانی گل، سول سوسائٹی ءُ رسانکدرءَ لوٹ کن آں کہ منی برات ءُ ناکوزتک ءِ پہ زوتیں آجوئی ءَ وتی کرد ءَ پیلوبہ کن اَنت۔
