اسلام آباد ءَ بلوچ یکجھتی کمیٹی ءِ سروک ءُ زور بیگواھیں مردمانی کھولانی زھرشانی ءَ سی ءُ شش روچ سرجم بیتگ کہ انگت ءَ برجاہ اِنت۔
اے بابت ءَ زھرشانی کنوکیں مردمانی گوشگ اِنت کہ مارا سی ءُ شش روچ اِنت کہ ما اد ءَ پہ زھرشانی ءَ ھمے اوست ءَ نشتگ ایں سرکار مئے لوٹاں گوش بہ دار ایت بلے چہ سرکار ءِ نیمگ ءَ پہ مئے لوٹانی گوش دارگ ءَ ھچ وڑیں گامگیج زورگ بوگ ءَ نہ اِنت۔
آیاں گوشتگ کہ ما چہ سرکار ءَ ھمے لوٹ ءَ کن ایں کہ آ چہ بھتام جنگ ءُ پہ پرایمنیں زھرشانی ءِ ھلاس کنگ ءِ جھد ءَ ابید یکبرے بیا اَنت ءُ اے سانمندیں ماتانی درداں گوش بدار اَنت۔
آیاں گوشتگ کہ پیرزالیں ماتاں وتی گس ءُ زھگاں وتی وانگ یلداتگ ءُ اد ءَ اتکگ اَنت کہ مئے پریات گوش دارگ ءُ مئے آزیز یل کنگ بہ بنت بلے چہ سرکار ءِ نیمگ ءَ ھچ وڑیں گامگیج زورگ بوگ ءَ نہ اِنت۔
آیاں گوں انسانی ھکانی ادارھاں لوٹ کرتگ ءُ گوشتگ کہ مئے زھرشانی ءَ کمک بہ کن اِت ءُ پہ مئے ناھکیں بندیگیں بی وائی سی ءِ رھشونانی یل کنگ ءُ بیگواھیں مردمانی آجوئی ءَ وتی کرد ءَ پیلو بہ کن اِت۔
