گوں بلوچ راجی زْرمبشت ( بی این ایم ) ءَ بندوکیں انسانی ھکانی گل پانک ءَ جولائی 2025 ءِ وتی گزارش شنگ کرتگ ۔ گزارش ءِ تہ ءَ بلوچستان ءَ زور بیگواھی ، در آمیدگسی کوش ، آزار دئی ءُ شھرمنندانی سر ءَ ارش ءِ ویل گواچنی نبشتگ اَنت۔ گزارش ءِ رد ءَ پاکستانی لشکر ءُ گوں آئی ءَ بندوکیں ادارھاں جولائی ءَ کم ءَ کم 96 مردم زور بیگواہ ءُ 19 درآمیدگسی کشتگ۔
ھسابءِ رد ءَ ، جولائی ءَ کیچ ھنکین چہ درساں گیش سانمند بیتگ چہ آ اود ءَ 19 مردم زور بیگواہ بیتگ۔ چہ ایشی ءَ پد چہ شال ءَ 17 ءُ گوادر ءَ 9مردم ءِ زور بیگواھی ءِ ھال رس اتگ۔ ھمے پیم آواران ءَ 8 ، واشک ءَ 7 ، کراچی ءُ پنجگور ءَ چہ ھر یک جاھے ءَ 5 ، نوشکے ءُ ڈیرہ گازی ھان ءَ 3 ، 3 ، ڈیرہ بگٹی ، مستونگ ءُ لسبیلہ ءَ2 ، 2 مردم زور بیگواہ کنگ بیتگ۔ چہ ایشاں ابید چہ ھزدار ، کلات ، چاگی ءُ اسلام آباد ءَ یک یک مردمے زور بیگواہ بیتگ۔
گزارش ءَ تربت ءِ نندوکیں ھشت سالی ئیں زھگ شئیب ھالد ءِ دزگیری ءِ بارہ ءَ ھم گْوشگ بیتگ۔ آئی ءَ انسانی ھکانی کارکن گلزار دوست ءِ گْوشتانکے ماں چاگردی رسانکدر ءَ شنگ کرتگ ءُ ھمے میار ءَ دزگیر کنگ بیتگ۔
گزارش ءَ 10 جولائی ءَ ایپ سی ءِ راکٹ ارشانی بارہ ءَ ھم نبشتگ۔ ایپ سی ءَ ماں گورکوپ کیچ ءَ گوازی پڑے ءَ گوں راکٹاں ارش کرتگ چہ اے ارش ءَ ھپت شھرمنند ٹپی بیتگ ، چہ ایشاں الی گلام ءَ ٹپ نہ سگ اتگ اَنت ءُ بیران بیتگ ، شھاب دوستدل کوما ءَ اِنت ءُ آدگہ کہ سکا ٹپی اَنت درمان کنگ بیگ ءَ اَنت۔مردماں گْوشتگ کہ ایپ سی ءَ پہ زور شھرمنند نشانگ کرتگ اَنت ، آیاں لوٹ کرتگ ، ایپ سی ءِ اے کردگار ءِ آزات ءُ شیشاریں وڑے ءَ پٹ ءُ پول بہ بیت۔
پانک ءِ گزارش ءِ رد ءَ در آمیدگسی کوش دنیگت مزنیں جیڑھے۔ جولائی ءَ کم ءَ کم 19 کس کشگ بیتگ ، کشگ بیتگ مردمانی تہ ءَ گون اَنت : کریم جان (مشکے، کندڑی)، ھمل(تمپ، گومازی)، گلام جان (آواران، پھو)،ازمت رند (ڈیرہ مراد جمالی)، مجاھد (ھاران)، شاہ در مینگل (چاگی، نوکنڈی)، ھمید (آواران، کوٹو جھاؤ)، نذیر اھمد (جھاؤ، آواران)، نور خان (جھاؤ، آواران)، کمبر اسلم (کشاورد مزدور، خضدار)، مزار (مشکے، کندڑی)، ڈاکٹر ابدالمجید مینگل، تاالرھمان مینگل ءُ ممتاز مینگل (وڈھ، خضدار)، الی گلام (کیچ، گورکوپ راکٹ ارش) ءُ شاہ جھان (پنجگور، چتکان)۔چہ ایشاں ابید چہ کلات ءِ ھند کھوک ءَ سئے مردمانی ژانگولیں کنٹ ھم دست کپتگ ، آیانی دیم ءَ تیزاپ پریچگ بیتگ پمیشکا پجاہ آرگ نہ بیتگ اَنت۔
