چہ شال ءِ ھند لوڑکاریز ءَ پاکستانی پوج ءِ دست ءَ زور بیگواھیں مردمانی کھولاں چہ شال پریس کلب ءَ پریس کانپرنس کرتگ ءُ گوشتگ کہ 13 اگست 2025 ءَ ریاستی ادارھاں میتگ ءَ بیڑ برتگ ءُ چادر ءُچاردیوالی لگتمال کرتگ اَنت۔ آیاں جنین ءُ زھگاں ھوار مردم لٹ ءُ کٹ کرتگ اَنت۔ آیاں جنینے ءَ ھوار آدگہ مردم آوار جتگ اَنت کہ آیانی تہ ءَ سے ورنا ھوار اِنت۔
آئی ءَ گوشتگ کہ چہ کھول ءِ جست گرگ ءَ کارمنداں ھمے گوشتگ کہ جستءُ پرس کنگ ءَ پد داں بیگاہ ءَ یل کنگ بنت۔ دانکہ شپ ءَ آیانی ھچ وڑیں ھال نہ رستگ گڑا کھول پہ ایپ آئی آر ءَ ایس ایچ او ءِ کِر ءَ شتگ اَنت گڑا آئی ایپ آئی آر نبشتہ نہ کرتگ۔
آئی ءَ گوشتگ کہ ما پہ وتی آزیزانی بابت ءَ آمیدگس ءَ شتگ ایں گڑا اود ءَ مارا ھمے گوشگ بیتگ کہ شمئے مردم ناشرکاری ءِ گَر ءُ دار ایں آمیدگس ءَ پیش کنگ بنت۔ ناشرکاری ءِ گر ءُ دار ایں آمیدگس ءَ سی آئی ڈی ءِ کارمندانی نیمگ ءَ پیش کنگ بیتگ اَنت ءُ پہ ھپتگے ریمانڈ ءَ دیم دیگ بیتگ اَنت۔
آئی ءَ گوشتگ کہ سی ٹی ڈی ءِ کارمنداں کانودی لوٹانی پیلو کنگ ءَ ابید چادر ءُ چار دیوالی لگتمال کرتگ ءُ مئے جنین کمشرپ کرتگ اَنت ءُ گسانی سامان تاوان داتگ اَنت ءُ مئے آزیز درکانودی دزگیر کرتگ اَنت ءُ آیانی سر ءَ درکانودی کیس جتگ ءُ تھنا شش مردم آمیدگس ءَ پیش کرتگ، بلے آیانی پیشی ءِ وھد ءَ کھول سھی کنگ نہ بیتگ اَنت ما پہ آیاں ترسگ ءَ ایں۔
آئی ءَ گوشتگ کہ مئے مردم آمیدگس ءَ پیش کنگ بیتگ اَنت بلے کھولاں پیش دارگ ءُ آیانی کیسانی بابت ءَ ھم گوشگ نہ بیتگ کہ ما کانودی کاروائی ءِ بابت ءَ دیمپانی کرت بہ کن ایں۔
