بلوچ یکجھتی کمیٹی ءِ سروک سمی دین اسلام آباد ءَ چہ زھرشانی نندانکءَ گوں اھوالکاراں تران کرتگءُ گوشتگ کہ پہ بلوچ ءِ ھکاں گپ جنوکیں مردماں مزنیں رسانکدری ادارہ رپورٹ کنگ ءَ نہ اَنت۔ آ بلوچستان ءِ پہ ھکاں چست بیتگیں زرمبشت ءَ شکی کنگ ءِ جھد ءَ کنگ ءُ گوں سلاہ بندیں گلاں ھمگرنچ کنگ ءِ جھد ءَ اَنت۔
آئی ءَ گوشتگ کہ بلوچ یکجھتی کمیٹی ءُ آئی زرمبشت ءَ دری ڈیھانی کمکار ءُ ناشرکار گوشگ ءَ اَنت۔ بلے پد ءَ ھم چہ میان استمانی انسانی ھکانی گلانی نیمگ ءَ مارا مزنیں کچے ءَ کمک کنگ بوگ ءَ اِنت۔
سمی دین ءَ اھوالکارے ءِ جست ءِ پسو ءَ گوشتگ کہ امریکہ ءِ وڑیں ڈیھ بس زور چار اَنت کسے کہ توانمند بہ بیت ھمائی پھنات ءَ بنت۔
آئی ءَ گوشتگ کہ مرچی پاکستان ریاست یک توانمندے آ مرچی ھمیشی پھنات ءَ اِنت اگاں باندا بلوچ ھم یک توانمندے جوڑ بہ بیت گڑا امریکہ بلوچ ءِ گون ءَ ھم اوشت ایت۔
