بلوچ اسٹوڈنس کونسل اسلام آباد ءِ جارکش ءَ وتی شنگ کرتگیں درشانے ءَ گوشتگ کہ کائد آزم زانشتجاہ اسلام آباد ءَ ھوار بنجاہ ءُ پنجاپ ءِ درسیں وانگجاھاں بلوچ نودربر یکشل ءَ بلوچ بوگ ءِ بنیاد ءَ نشانگ کنگ ءُ ترسینگ بوگ ءَ اَنت۔ پجار ءِ بنیاد ءَ ترسینگ، نشان کنگ ءُ زوریں بیگواھی وانگجاھانی دود ءِ بھرے جوڑ بیتگ۔ ریاستی ادارھانی نیمگ ءَ بلوچ نودربرانی یکشل ءَ زور بیگواہ کنگ ءُ آیانی نشان کنگ نوکیں گپے نہ اِنت ءُ نہ ھم ھلاس بوگ ءِ نام ءَ زانت، بلکیں ریاستی ادارھانی شوندات ءِ درچے جوڑ بیتگ۔
جارکش ءَ گوشتگ کہ کائد آزم زانشتجاہ اسلام آباد ءِ ڈیپنس اینڈ اسٹریٹجک اسٹڈیز ءِ پنچمی بھرگ ءِ نودربر سئید بلوچ گوستگیں ماہ ءَ ھشت جولائی ءَ بیگاہ ءَ ھپت ءُ نیم ءَ چہ اسلام آباد 26 نمبر ٹول پلازه ءِ نزیک ءَ چیریں ادارھانی کارمنداں ھما وھد ءَ چہ بس ءَ ایر کرتگ ءُ آوار جتگ کہ آ گوں وتی سنگتانی ھمرائی ءَ چه اسلام اباد ءَ دیم په شال ءَ روگ ءَ بیتگ ۔ آئی ءِ زوربیگواھی ءَ ریاستی چیریں ادارھانی کارمنداں ھوار ، کائد آزم زانشجاه ءِ انتزامیه ، ڈیپنس اینڈ اسٹریٹجک اسٹڈیز ڈیپارٹمنٹ ءِ باسک ءُ بچکانی ھاسٹل ءِ سروکانی ھوار بوگ ءِ بابت ءَ مئے کر ءَ منانک ھست۔
آئی ءَ گوشتگ که چه اے ویل ءَ لھتیں روچ پیش 1 جولائی ءَ بچکانی ھاسٹل ءِ سروک راشد ملک ءَ واٹس ایپ ءِ پارست ءَ چه بلوچ نودربراں سئید بلوچ ءِ بابت ءَ جست ءُ پرس کنگ ءِ جھد کرتگ ، چه ایشی ءَ ابید 3 جولائی ءَ ڈیپنس اینڈ اسٹریٹجک اسٹڈیز ڈیپارٹمنٹ ءِ کلرک کامران ءَ سئید بلوچ ءِ سر ءَ پون کرتگ ءُ انٹرویو ءِ نیمون ءَ آ گوں دو شکی ئیں مردماں گند ءُ نند کنائینتگ ، اے گند ءُ نند ءَ ڈیپارٹمنٹ ءِ باسک نوید کیسر ءُ سادک ھم ساڑی بیتگ اَنت ءُ آیاں گوں جتائیں جُستاں سئید بلوچ آزار داتگ ، ھمے وڑ ءَ 4 جولائی ءَ لھتیں شکی ئیں مردماں بچکانی ھاسٹل نمبر 11 ءِ اوتاگ 43 ءَ بیڑ برتگ ءُ سئید بلوچ پٹ ءُ پول کرتگ ، چه اے درسیں ویلاں تچک ءَ زانگ بیت که که سئید بلوچ ءِ زوربیگواھی یک تچک شوربندی یے ءِ بھرے بیتگ۔
جارکش ءَ گوشتگ که لھتیں روچ پیش چه کائد آزم زانشجاه ءَ 172 نودربر دزگیر کنگ بیتگ اَت که آیانی ته ءَ بلوچ نودربر هم ھوار اَنت ، بلے پولیس تانه ءَ سی ٹی ڈی ءَ هوار آدگه ریاستی ادارھانی کارمندانی بلوچ نودربر جتا کرتگ ءُ چه آیاں جتائیں جست کنگ بیتگ ، آزار دیگ ءُ آیانی سر ءَ بھتام جنگ بیتگ ، اگاں یک ریاستے ورناھاں زوربیگواه کنت ، آیاں سسائی نادراه کنت ءُ چه وانگ ءُ زانگ ءِ بنکی ھکاں زبھر کنت اے تھنا زوراکی یے نه اِنت بلکیں میارباری یے که اے میارباری گوستانک ءِ ته ءَ نکش بیت۔
