بلوچ وومن پورم ءِ سروک ڈاکٹر شلی بلوچ ءَ وتی شنگ کرتگیں درشانے ءَ گوشتگ کہ ھکیم بلوچ ءِ زوریں بیگواھی تھنا یک باسمائیں ورنایے ءِ بیگواھی نہ اِنت بلکیں زانت ءُ زانگ ءِ دارگ ءِ جھد اِنت، مرچی بلوچ ءَ ھوار ھمک ھما زانتکاریں ورنا نشانگ کنگ بوگ ءَ اِنت کہ آ وتی چاگرد ءِ دیمروئی ءِ مانزمان اَنت۔ مرچی زوراک باسمائیں ورنایاں یک یک ءَ زندانی کنگ ءَ اِنت یا درچِنگ ءُ کشگ ءَ اِنت۔ آ کدی ھم نہ لوٹ ایت کہ ایردستیں راج رُژنائی ءِ نیمگ ءَ گام جنان بہ کنت۔ آ ھمے لوٹ ایت کہ ایردستیں راج مُدام تھارونکی ءِ تہ ءَ بند کنگ بہ بیت۔
آئی ءَ گوشتگ کہ بلوچستان ءَ بلوچ ءِ چُکچینی یکشل ءَ برجاہ اِنت ءُ زوریں بیگواھی ءِ درچ روچ پہ روچ ودان اِنت۔ بلوچ سیاسی ادارہ بی وائی سی ءُ این ڈی پی سر ءَ ریاستی کریک ڈاؤن برجاہ اِنت ،اسلام آباد، کراچی ءُ بلوچستان ءَ بلوچ پہ وتی گار ءُ بیگواھیں پُسگانی آجوئی ءَ زھرشانی کنگ ءَ اَنت۔
ڈاکٹر شلی بلوچ ءَ گوشتگ کہ اے وھد ءَ نہ ایوک ءَ بلوچ ءِ ورنائیں بچ زور بیگواہ ءُ زندانی اَنت، بلکیں بلوچ ءِ جنک ماہ جبین بلوچ ءِ پیم ءَ بیگواہ اَنت ءُ ڈاکٹر ماہ رنگ بلوچ، بیبو بلوچ ءُ گلزادی بلوچ ءِ وڑ ءَ درکانودی بندیگ اَنت۔
آئی ءَ گوشتگ کہ انوگیں وھد ءِ لوٹ ھمیش اِنت کہ مارا یکجاہ ءُ یکمشت بوگی اِنت ءُ پہ اے زوراکیانی دیم ءِ دارگ ءَ جھد کنگی اِنت گڑا ما وتی راج ءِ باندات ءِ چراگاں رکینت کن ایں ءُ وتی راج ءَ وشھالیں بانداتے دات کن ایں۔
