بلوچ یکجھتی کمیٹی ( بی وائی سی ) ءِ سروک سمی دین بلوچ ءَ ماں رسانکدر ءَ وتی شنگ کرتگیں درشانے ءَ گوشتگ که اسلام آباد ءَ زوربیگواهیں مردمانی کھول ءِ زھرشانی ءَ بیست ءُ دو روچ سرجم بیتگ۔ ریاست ءِ بنجاھی شھر ءَ برجاھیں ایمنیں زھرشانی ءِ نیمگ ءَ نه ریاست دلگوش دیگ ءَ اِنت ءُ ناں که اے بابت ءَ چونیں گامیگجے زورگ بیتگ۔
آئی ءَ گوشتگ که چه ریاست ءِ نادرسی ءُ یکشلیں زوراکیاں ابید ھم اے مات ، گھار ءُ زھگ بی وائی سی ءِ دزگیری بیتگیں سروکانی یل کنگ ءُ زوربیگواھیانی پیمیں ٹوھیں مردمی ویلانی بگیری ءَ یکشل ءَ زھرشانی کنگ ءَ اَنت ءُ لوٹانی سر ءَ اوشتاتگ اَنت۔
سمی دین ءَ گوں اسلام آباد ءِ سول سوسائٹی ، انسانی ھکانی کارکن ، نودربر ، سیاسی ءُ چاگردی سروک ءُ آدگه انسان دوستیں مردماں لوٹ کرتگ که آ اے زھرشانی ءَ کمک بہ کن اَنت ءُ ھوار به بنت دانکه چہ وتی ھستمان ، توار ءُ یکجاھی ءَ اے جھد ءَ گیش مھکم به کن اَنت۔
سمی دین ءَ وتی درشان ءِ گڈی ءَ گوشتگ که مئے بے تواری زوراکی ءَ گیش مھکم کنت ءُ ھوار بوگ نزوریں مردمانی توکل اِنت ، اے وھد ءَ ما چہ بے توار ءَ نندگ ءُ چارگ ءِ جاه ءَ اے مچی گھگیری ءَ ھوار بہ بہ ایں۔
