نیشنل ڈیموکریٹک پارٹی ءَ ماں رسانکدر ءَ وتی شنگ کرتگیں درشانے ءَ گوشتگ کہ 16 جنوری 2024 ءَ ایران ءِ نیمگ ءَ پنجگور ءِ شھر ءَ آبادیانی سر ءَ اُرش کنگ بوتگ۔ ایشی ءِ آسر ءَ کودکیں جنین ءُ زھگاں ھوار باز مردم شھید ءُ ٹپی بوتگ۔ ایشی پژدر ءَ 17 جنوری ءَ پاکستان ءِ نیمگ ءَ ایران ءِ چیردستیں شھر سراوان ءَ اُرش کنگ بوتگ، ایشی داں انوں باز جنین ءُ زھگ میزائلانی زد ءَ آتکگ ءُ شھید بوتگ اَنت۔
آئی ءَ گوشتگ کہ پنجگور ءُ سراوان جھان ءِ ھساب ءَ دو جتائیں ریاستانی تہ ءَ اَنت، بلے اد ءَ جھنندیں آبادی بلوچ اَنت۔ ناشرکاری ءِ نیمون کنگ ءُ بے میار کودکیں شھرمنندانی سر ءَ میزائل اُرش کنگ دوئیں نیمگاں ریاستی زوراکیاں پدر کنت۔
جارکش ءَ گوشتگ کہ بلوچ راج چہ پیش ءَ زوریں بیگواھی، ژانگولیں لاش ءُ تچکیں پاھوانی زد ءَ اَنت ءُ نوں اے وڑیں اُرش اسلام آباد ءُ تھران سرکار ءِ رستری ءَ پدر کنت۔
آئی ءَ گوشتگ کہ میان استمانی ادارھانی بنکی زمہ واری بیت کہ بلوچ چکچینی ءِ انوگیں دوئیں نیمگاں اُرشانی دارگ ءَ وتی کرد ءَ پیلو بہ کن اَنت، پمیشکا کہ اگاں میان استمان ءِ اے اُرشانی نیمگ ءَ دلگوش دیگ نہ بوت گڑا کنت کہ اے دمگ ءَ گنتریں جاورے ودی بہ کن اَنت۔ ایشانی نشانگ دوئیں نیمگاں جھمنندیں بلوچ بنت۔
