کراچی: زور بیگواھیں امیر بکش بلوچ ءِ جنک سدپ امیر بلوچ گوں بلوچ یکجھتی کمیٹی ءِ سروک سمی دین ءِ ھواری ءَ کراچی ءَ پرس کلب ءَ پریس کانپرنس کرتگ ءُ چہ ریاستی ادارھاں لوٹ کرتگ کہ امیربکش بلوچ چہ یازدہ سال ءَ بیگواہ اِنت آجو کنگ بہ بیت، آئی سر ءَ چونیں بھتامے ھست گڑا آمیدگس ءَ پیش کنگ بہ بیت۔
سدپ امیربلوچ ءَ گوشتگ کہ منی پت امیر بکش بلوچ 4 اگست 2014 ءَ چہ گوادر ءِ ھند امبی بازار کلانچ ءَ پاکستانی پوج ءَ بیگواہ کرتگ۔ یازدہ سال ءِ گوزگ ءَ ابید آئی بابت ءَ مارا ھچ وڑیں سرپدی دیگ نہ بیتگ کہ آ زندگ اِنت یا نہ ۔
آئی ءَ گوشتگ کہ زوریں بیگواھی تھنا یک مردمے ءِ جیڑہ نہ اِنت بلکیں سرجمیں کھول ءَ یکشل ءَ جنجالانی آماچ کنت۔ ما پہ وتی پت ءِ آجوئی ءَ آمیدگس، انسانی ھکانی ادارہ، سرکاری کارگس ءُ زھرشانیاں ھوار گوں پر ایمنی ءَ جھد کرتگ، بلے ما ھمک وھد ءَ بے اوست کنگ بیتگ ایں۔
سدپ امیر ءَ گوشتگ کہ پاکستان ریاست، آمیدگس، کانود ءِ پھازداریں ادارہ ءُ گوں انسانی ھکانی کار کناں لوٹ کن ایں کہ ما تھنا پہ وتی پت ءِ آجوئی ءَ لوٹ ایں، اے لوٹ دگہ سیاسی ٹولی یا زرمبشتے ءِ نہ اِنت، بلکیں یک جنکے ءِ پریات اِنت چہ یازدہ سالاں شپ ءُ روچ وتی پت ءِ وداریگ اِنت۔
