شال: پہ زور بیگواھیں مردمانی پدجنگءَ شدکشیں زھرشانی گدان ءَ 5900 روچ سرجم بیتگ۔ دوشمبے ءِ روچ ءَ ایڈوکیٹ ھالدہ ءُ آدگہ مردم پہ ھمدردی درشان کنگ ءَ گدان ءَ اتکگ اَنت۔
وی بی ایم پی ءِ سرکماش نسر اللہ بلوچ ءَ گوشتگ کہ ھما وڑ ءَ مولانا ھدایت الرھمان ءِ روانک پنجاپ ءَ وش اتک کنگ بیت مریم نواز گوں آئی ءَ گپ ءُ تران کنت ءُ پد ءَ سرکار آئی ءَ شرپ بکش ایت، اگاں ھمے وڑ ءَ اسلام آباد ءَ بلوچ جنین وش آتک کنگ بیت اَنت ءُ مریم نواز ءُ سرکار ءَ آیان ءَ مھر بہ داتین ءُ گوں آیاں گپ ءُ تران کرتگیں گڑا بلوچستان ءِ ماتءُ جنکاں اے وھد ءَ پد ءَ بلوچستان ءَ اتکگ ءُ وشیں کلوھے آورتگ اَت۔
آئی ءَ گوشتگ بژن اِنت کہ اسلام آباد ءَ بلوچ جنینانی گون ءَ ڈیھ ءِ کانود ءِ رد ءَ پیش بوگ ءَ ابید آگوں جتائیں ھیلھاں ترسینگ بوگ ءَ دانکہ آ لاچار بہ بنت ءُ وتی زھرشانی ءَ ھلاس بہ کن اَنت ءُ واتر بلوچستان ءَ برو اَنت۔
نسر اللہ بلوچ ءَ گوشتگ کہ سرکار ءُ ڈیھ ءِ ادارھانی سروکاں سنگین بوگ لوٹ ایت، اسلام آباد ءَ بلوچ جنیناں زھرشانی کنگ ءِ ھک دیگ بہ بیت۔ آیان ءَ دست سر ءَ مشگ ءُ گوں آیاں زوت گپ ءُ تران کنگ لوٹ ایتءُ چہ زھرشانی ءِ رنجاں آجو کنگ لوٹ اَنت۔
آئی ءَ گوشتگ کہ ڈاکٹر ماہ رنگ بلوچ، بیبگر بلوچ، گل زادی بلوچ، بیبو بلوچ،سبگت اللہ شاہ جی بلوچ، گپار کمبرانی ءُ امران بلوچ پہ زوریں بیگواھی ءُ بلوچ راج ءِ ھکاں توار چست کنگ ءِ پژدر ءَبند کنگ بیتگ اَنت۔ ما سرپد بہ ایں کہ آ سیاسی بندیگ اَنت ءُ آیانی بندیگ کنگ پر ایمنیں توارانی بندش جنگ زانگ بیت، ایشی ڈیھءُ میان استمانی کانود ھچ وڑ ءَ موکل ءَ نہ دے اَنت۔
آئی ءَ گوشتگ کہ ما یکبرے پد ءَ لوٹ کن ایں ڈاکٹر ماہ رنگ بلوچ ءَ ھوار پہ آدگہ پر ایمنیں جھدکارانی زوتیں یل کنگ ءَ دلجمی بدے اِت۔
