پنجگور: 1 اگست ءَ چہ بلوچ اسٹوڈنٹس ایکشن کمیٹی پنجگور ھنکین ءِ نیمگ سید ھاشمی ءِ نام ءَ لبزَانکی مراگِشے برجم دارگ بیتَگ۔مراگش ءَ استاد ءُ نودربراں ھوار جتائیں بھرگاں سیادی داروکیں مردماں بازیں کچے ءَ بھر زرتگ۔
اے مراگش جتائیں بھرانی تہ ءَ بیتگ کہ تران، پینل تران، پٹ ءُ پولی تاک، شئر ءُ شائری، کتاب اسٹال، ساز ءُ زیمل، بلوچی چاپ ھوار بیتگ اَنت۔
آیاں سید ھاشمی ءِ زند ءُ ازم ءِ سر ءَ گپ جتگ ءُ گوشتگ کہ سید زھور شاہ ھاشمی 21 اپریل 1926 ءَ ماں گَنجیں گوادر ءَ ودی بیتگ، آ نہ تھنا شائرے بیتگ بلکیں زبان زانت ، پولکار، زیمر زانت ءُ کواسے ءَ ابید بلوچی زبان ءُ لَبزانک ءِ مزنیں رھشونے بیتگ۔
آیاں گوشتگ کہ سید زھور شاہ ھاشمی بلوچی زبان ءِ پڑا جتائیں بھرگاں کار کرتگ آئی کارانی تہ ءَ بنداتی گدار، آزمانک، بلوچی گال بلد، بلوچی زبان ءِ گرامر ءُ آدگہ ھوار اَنت۔ آ یک مردمے بیتگ بلے آئی چہ ادارھے ءَ گیش کار کرتگ۔ بلوچی زبان ءِ زندگ دارگ ءَ آئی مزنیں کردے پیلو کرتگ۔
