بلوچ نیشنل موومنٹ ( بی این ایم ) ءِ بنجاھی کابینہ ءِ دیوان چیئرمین ڈاکٹر نسیم بلوچ ءِ سروکی ءَ برجم دارگ بیتگ۔ دیوان ءَ سینر وائس چیئرمین ڈاکٹر جلال بلوچ، جونیئر وائس چیئرمین بابل لتیپ بلوچ، کارگشاد دل مراد بلوچ، دری کارانی کارگشاد پھیم بلوچ، کمک کارگشاد کمال بلوچ، جوائنٹ سیکریٹری ھسن دوست، رسانکدری ءُ ربیدگی کارگشاد کازی داد مھمد ریھان، انسانی ھکانی کارگشادڈاکٹر نازر نور، گھبودی کارگشاد اکبال بلوچ ھوار بیتگ اَنت۔
دیوانءَ گل ءِ کار، سیاسی جاور ءُ بلوچستانءُ میان استمانی تکءَ پارٹی ءِ گل ءِ کارءُ پارٹی ءِ پروگرامانی دیمروئی ءِ سر ءَ چمشانک داتگ ءُ درساں وتی رپورٹ پیش کرتگ اَنت۔ پہ آھوکیں گامگیج ءَ گوں دلجمی ءَ گپ ءُ تران ءُ پیسلہ کنگ بیتگ۔
ڈاکٹر نسیم بلوچ ءَ تران کرتگ ءُ گوشتگ کہ مرچی من ءَ سکا وشی بوگ ءَ اِنت کہ من یک انچیں ٹیمورکے ءِ سروکی ءَ کنگ ءَ آں کہ مچی راھبند، لیکھی ھمگرنچی ءُ راجی زمہ واری ءِ مارشت ءَ سرپد اَنت۔ اے وڑیں ٹیمورک زرمبشتاں تھنا مھکم نہ بلکیں نوکیں توانے دے اَنت۔
آئیءَ گوشتگ کہ سیاسی پارٹی تھنا مردمانی مچی نہ بلکیں آ لیکھی ءُ کردی ھمگرنچی ءَ بیت کہ آ راجی رھشونی ءِپرز ءَ پیلو کنت۔ مئے ھوارکاری، مئے گل ءِ ھمگرنچی ءُ گوں مول ءَ وپاداری، مارا چہ ایردستی ءَ کشگ ءَ اے دراجکشیں سپر ءَ توکل بکش ایت۔
آئی ءَگوشتگ کہ بلوچستان ءِ جاور پہ مئے راجی آجوئی ءِ گرگءَ ھچ وڑ ءَ شر نہ بنت۔ دانکہ مئے زرمبشت برجاہ اِنت چہ دژمن ءَ ھچ پیمیں دودمانی یا کانودی رویشتءِ اوست ءِدارگ وتی رد دیگ اِنت۔ مارا ھمےجاورانی تہ ءَ گل ءِ کار ءُ جھد داں گڈی منزل ءَ سر کنگی اِنت۔
آئی ءَ دیمتر ءَ گوشتگ کہ ریاستی زوراکیانی ترندی بلوچ راجءَ لیکھی ءُ سسائی پارست ءَ نزور کنگ ءِ جھد ءَ کنت۔ بلے مئے زمہ واری بیت کہ ما راھمے زوراکیانی میانءَ زانشتی گھگیری، سیاسی گل ءُ شوربندیانی ھواری ءَ راہ کشگی اِنت۔ زرمبشت ھما وھد ءَ سوبمند بنت گوں یکشلیں ھیلکاریءَ دیم ءَ بہ جنز اَنت۔
ڈاکٹر نسیم بلوچ ءَ گوشتگ کہ مرچی ڈائسپورہ ءَ ما جوانیں وڑے ءَ دیم ءَ جنزگ ءَ ایں۔پاکستان میان استمانی تک ءَ وتی دروگیں گپانی پیش کنگ یا میان استمانی توانمندانی پہ باور کناھینگ ءَ وتی زور ءَ چکاسگ ءَ اِنت کہ مئے جھد ءَ گوں ناشرکارءُ آزار دھی ءَ ھوار بہ کنت، بلے ما اے گپانی دیم پہ دیمی ءَ گوں راجی راستی ءُ مھکمیں سیاسی بودناکی ءَ کنگ ءَ اینءُ دیم ءَ ایشی ءَ گیش ترند کن ایں۔ مارا نوکیں رسانک یا بنشون، سپارتی جنجال ءُ میان استمانی کانودانی ھساب ءَ وتی گپ جوانیں وڑے ءَ داں جھان ءَ سر کنگی اِنت۔
آئیءَ گوشتگ کہ مرچی بلوچ نیشنل موومنٹ ءِ جتائیں بھرگانی تہ ءَ کار کنگ ءِ باز موہ ھست، بلے گپ ایش اِنت کہ تھنا نیک نیتی ءُ زمہ واری مارگی اَنت۔ من گوں بلوچ ورنایا لوٹ کن آں کہ آ شھید گلام مھمد ءِ کاروان ءَ ھوار بہ بنت ءُ راجی پدریچ ءِ جھد ءَ مھکم بہ کن اَنت۔
آئیءَ دیمتر ءَ گوشتگ کہ مئے سوبمندی تھنا میان استمانی تک ءَ مئے توار ءِ سر بوگ یا گل ءِ نیمگ ءَ راھبند، اے درس مئے کارکنانی شپ ءُ روچانی جھدانی برورد اَنت۔ بلے راجی آجوئی زرمبشت گوں تچکیں راجی لیکہ ءَ یکشلیں جھد ءِ نام اِنت۔ مئے مرچیگیں کسان کسانیں سوبمندی باندات ءِ مزنیں سوبمندیانی بنیاد جوڑ بنت۔
