تُربَت: چہ شاہ آباد آسکانی ءَ دو ماہ پیش کشندہ ٹولی ءِ کارمندانی دست ءَ بیگواہ کرتگیں ھاتر ء لال بکش ءِ کھول ءَ پہ آئی آجوئی ءَ توار چست کنگ ءِ لوٹ کرتگ۔
آئی کھول ءِ گوشگ اِنت کہ ھاتر ء لال بکش کیلکور ءِ جھمنند اِنت ءُ دو ماہ پیش چہ تُربَت ءَ شاہ آباد آسکانی ءَ کشندہ ٹولی ءِ کارمنداں آوار جتگ ءُ بیگواہ کرتگ۔
کھول ءَ گوشتگ کہ ھاتر دبئی ءَ مزدوری کنگ ءَ بوتگ ءُ وتی موکلاں آتکگ ءُ آ نادراہ اِنت ءُ الاج کنگ ءَ بوتگ کہ آوار جنگ بوتگ۔
آئی کھول ءَ چہ انسانی ھکانی ادارھاں پہ ھاتر ءِ آجوئی ءَ توار چست کنگ ءِ لوٹ کرتگ ءُ گوشتگ کہ پہ ھاتر ءِ زوتیں آجوئی ءَ توار چست بہ کن اِت۔
چوش کہ ھاتر ءِ آدگہ برات ماجد ء لال بکش ءَ کشندہ ٹولی ءِ کارمنداں 24 جولائی ءَ چہ شاہ آباد آسکانی ءِ پارم ءَ آوار جتگ ءُ بیگواہ کرتگ کہ انگت بیگواہ اِنت۔
