پشتون تھپز موومنٹ ءِ سروک منزور پشتین ءَ وتی شنگ کرتگیں درشانے ءَ گوشتگ کہ پنجاپی جرنیلانی زورگریں پوج ءَ باجوڑ ءَ لشکرکشی ءِ نام ءَ چہ ھزاراں سال جاہ منندیں پشتون وتی جند ءِ سرڈگار ءِ سر ءَ نشانگ کرتگ اَنت کہ چہ ایشی ءَ کسانیں زھگ ءُ اسپیت ریشیں کماش شھید ءُ ٹپی بیتگ اَنت۔
آئی ءَ گوشتگ کہ انوں پشتونانی دو مزنیں دمگ وزیرستان ءُ ھیبر ءَ آپریشن ءِ نام ءَ کاروائی کرتگ ءُ اود ءَ بے سوب بیتگ نوں اناگت ءَ بے جار ءَ پشتونانی دگہ یک گوستانکی ھندے باجوڑ ءَ ارش کرتگ۔
منزور پشتین ءَ گوشتگ کہ اے زوراکی ءُ ناھکیانی بگیری ءَ زوت آھوکیں گامگیج ءِ جار ءَ جن ایں، بلے رسانکدر ایشی بگیری ءَ توار چست بہ کنت۔
آئی ءَ گوشتگ کہ پروش وارتگیں کارمندانی ھمے پندلاں رد مہ کپ اِت کہ توار چست کنگ ءَ ھچ نہ رس ایت، ھمے جرنیلانی واھش اِنت کہ چے بیت پشتون بے توار بہ بنت دانکہ ما پشتون چکچینی ءَ گوں بے تواری ءَ برجاہ بدار ایں۔ منزور پشتین ءَ گوشتگ کہ چہ توار چست کنگ ءَ چے بیت یا نہ بیت بلے ھمک مردم وتی وس ءَ اے زوراکیانی بگیری ءَ بہ کنت ءُ پشتون راج ءِ پلہ مرزی ءَ الم بہ کنت۔
