بلوچ اسٹودنٹس آرگنائزیشن ( بی ایس او ) ءِ پیشیگیں سرکماش ءُ انسانی ھکانی نامداریں کارکن امران بلوچ که چار ماه پیش 3 ایم پی او ءِ رد ءَ دزگیر کنگ بیتگ اَت ، انگت ءَ زندان ءَ بند اِنت۔
امران بلوچ ءِ کھول ءُ انسانی ھکانی ادارھانی گوشگ اِنت که امران بلوچ زندان ءَ نه تنھا چه بنکی آسراتیاں زبھر اِنت بلکیں آ سکا سسائی ءُ جانی آزارانی ھم دیمپان اِنت۔
کھول ءِ گوشگ اِنت امران بلوچ ءَ چار ماه اِنت که زندان ءَ یک جتائیں اوتاگے ءَ بندیگ اِنت ءُ آئی ءِ اوتاگ ءَ مار ، زیم ءُ آدگه زھر داریں جناور ھست ، ھمے وڑ ءَ آ سرجمیں روچ ءَ اوتاگ ءِ ته ءَ بند اِنت ءُ آئی ءَ هچ کس ءَ گندگ ءِ موکل دیگ بوگ ءَ نه اِنت ، چه ایشی ءَ آئی ءِ جان سلامتی ءِ بابت ءَ ھچ وڑیں ھال نیست۔
کھول ءَ گوشتگ که چه زندان ءَ دست کپتگیں ھالانی رد ءَ امران ءَ شریں ورگ ءُ آپ ھم دیگ بوگ ءَ نه اِنت که چه ایشی ءَ امران بلوچ ءَ چه دو روچ پیش شدکش ھرتال بندات کرتگ۔
