بلوچ وومن پورم ءِ سروک ڈاکٹر شلی بلوچ ءَ چہ تربت پریس کلب ءَ پریس کانپریس کرتگ ءُگوشتگ کہ بلوچ وومن پورم ءِ نیمگ ءَ 27 جولائی ءَ گوادر پریس کلب ءَ یک روچی دیوانے ءِبرجم دارگ ءِ جار جتگ۔ ایشی مول بلوچانی سیاسی ھواری، زوریں بیگواھی ءُ دزگیریانی گیشی ءَ ریاستی زوراکیانی شرگداری بیتگ۔ پہ اے پروگرام ءِ چن ءُ لانچ ءَ مئے ٹیم ءَ گوادر شھر ءُ کِر ءُ کشاں پہ لس مھلوک ءِ سرپدی ءَ دیوال نبیسی ءُ گند ءُ نند بندات کرتگ۔
آئی ءَ گوشتگ کہ اے پر ایمنیں راھبندی جھد ءِ میان ءَ ریاستی ادارھانی نیمگ ءَ اڑاند ودی کنگ، ترسینگ ءُ یکشل ءَ رندگیری کنگ بیتگ ءُ گڈی ءَ مارا گوادرپولیس ءَ دزگیر کرتگءُ جنینانی بندیگجاہ ءَ برتگ۔ اود ءَ آیاں پہ پٹءُ پول ءِ نام ءَ مئے گون ءَ رستری کرتگ ایشی مول سسائی آزار دیگ ءُ مئے سیاسی توکل ءِ پروش دیگ بیتگ۔ اود ءَ مئے لوٹ منگ نہ بیتگ اَنت ءُ ما چہ گوادر ءَ تربت ءَ آرگ بیتگ ایں۔ اے کار انسانی ھک ءُ شھری آجوئی ءِ تچک ءَ بگیری اِنت۔
ڈاکٹر شلی بلوچ ءَ گوشتگ اے بژنی گپے کہ بلوچ وومن پورم گوں سیاسی زانشت ءَ پہ بنکی ھکاں توار چست کنت گڑا آئی درکانودی زوراکی ءِ رد ءَ بے توار کنگ ءِ جھد کنگ بیت۔ بلوچستان ءَ اے وھد ءَ سیاسی گل سیول سوسائٹی، بلوچ یکجھتی کمیٹی ءُ این ڈی پی ریاستی زوراکیانی دیمپان اَنت۔ کارکنانی بے ارزی ءَ دزگیری ءُ سیاسی کارانی راجی سلامتی ءِ نام ءَ میار لیکگ ھمےگپ ءَ پیش دار ایت کہ راجمستری ءِ نام ءَ اد ءَ تھنا زور کار مرز بوگءَ اِنت۔
آئی ءَ گوشتگ کہ ما ریاستءَ تچک ءَ گوش ایں کہ بلوچاں چہ بنیادی انسانی، سیاسی ءُ چاگردی ھکاں زبھر کنگ ءِ درچءَ زوت بند بہ کن اِت۔ آیاں چو ڈیھ ءِ آدگہ راجانی وڑءَ سرجم ءَ شھری ھک دیگ ءُ آیانی سیاسی توار گوں شرپ ءَ گوش دارگ بہ بیت۔ ما ھمے گپ ءَ زور دیں کہ میان استمانی اھوالکاری ادارہ، انسانی ھکانی گل، میان استمان اے درسیں جاورانی سر ءَ دلگوش گور بہ کنت دانکہ بلوچانی توار دارگ مہ بیت۔
ڈاکٹر شلی بلوچ ءَ گوشتگ کہ ما ھمے پریس کانپریس ءِ رد ءَ گوشگ لوٹ ایں کہ بلوچ وومن پورم پہ وتی بیادی ھک، بلوچ ءِ نپ ءُ سیاسی جھد ءَ ھچ وڑ ءَ دزکش نہ بیت ءُ ما وتی سیاسی جھد ءَ گیشتر تیز کن ایں۔
