بلوچ یکجھتی کمیٹی ءِ سروک ڈاکٹر ماہ رنگ بلوچ ءِ گھار نادیہ بلوچ ءَ ماں رسانکدر ءَ ایکس ءَ نبشتگ کہ اسلام آباد ءِ وڑیں شھرے ءَ بے نمبر پلیٹیں گاڑی یکشل ءَ مئے رندگیری ءَ کنگ ءَ اَنت۔ مارا ترسینگ ءَ اَنت بلے ریاستی ادارہ بے توار اَنت۔ اے گپ نہ اِنت کہ گاڑی کئے اَنت۔ ما اے گپ ءَ زان ایں کہ گاڑی کئے اَنت ءُ آیانی مول چے اِنت۔
آئی ءَ گوشتگ کہ راستیں جست ھمیش اِنت کہ اے ڈیھ ءَ پہ بلوچاں ھچ وڑیں کانود نیست۔ ما دژمنیں ریاست ءِ شھری نہ ایں۔ ما پہ وت ءَ دگہ باڑھی گس زرتگ مرچی ایشی واھند ریاستی ادارھاں زور داتگ کہ مارا چہ گس ءَ بہ کش ایت۔
نادیہ بلوچ ءَ گوشتگ کہ نوں اے پیرزالیں ماس، گھار ءُ ورنا پٹ ءَ بے آسر ءُ بے کمک ءَ پہ وتی آزیزانی آجوئی ءَ اوست ءَ کپتگ اَنت۔ ریاست ھما پیم ءَ وتی شھریاں بے گس کنگ، ترسینگ ءُ در پہ در کنگ ءَ اِنت بلکیں دژمنیں ڈیھ وتی بندیگانی گون ءَ اے وڑ نہ کنت۔
آئی ءَ گوشتگ کہ اگاں مارا بنجاھی شھرءَ گسے پہ باڑہ ءَ زورگ ءِ موکل نیست کم چہ کم مارا نیشنل پریس کلب ءِ دیم ءَ گدان جنگ ءُ زھرشانی کنگ ءِ موکل دیگ بہ بیت یا مارا تچک ءَ بہ گوش اَنت کہ اے ریاست ءَ پہ بلوچاں زمین، توار چست کنگ ءُ دم کشگ ءِ ھک نیست۔
نادیہ بلوچ ءَ گوشتگ کہ لھتیں ادار پیش پی ٹی آئی ءِ سروک ءَ تھنا پما نان آورتگ آئی ڈرائیور ءُ گاڑی بیگواہ کنگ بیتگ اَنت۔ اے ترسینگ نہ اِنت بلکیں بلوچانی سبک دیگ ءِ ریاستی شوربندی اِنت۔ ریاست ءَ اے ھم یاد کنگی اِنت کہ ھما راج پہ انساپ ءَ تیلانک دیگ بنت آ یک روچے ھم بے توار نہ بنت کوکار کن اَنت ءُ پد ءَ مڑ اَنت۔بلوچاں گوں دیوال ءَ جنگ ءَ بند بہ کن چی ءَ کہ دیوال بہ کپ ایت چہ آئی ھاکاں ریاست وت چیر ترایت۔
