پاکستانی پوج ءِ دست ءَ زوربیگواه کنگ بیتگیں گنی بلوچ ءِ کھول ءَ آئی ءِ زوربیگواھی ءِ بگیری ءَ چہ شال پریس کلب ءَ پریس کانپرس کرتگ ءُ گوشتگ که گنی بلوچ ءِ زوریں بیگواھی ءَ دو ماہ سرجم بیتگ کہ انگتءَ آئی بابت ءَ مارا ھچ وڑیں سرپدی دیگ ءَ نہ اَنت۔
آئی ءَ گوشتگ که گنی بلوچ 25 مئی ءَ چه هزدار ءِ نزیک ءَ زوربیگواه کنگ بیتگ ، ما 27 مئی ءَ په آئی کیس ءِ ایپ آئی آر کنگ ءَ ھزدار ءِ ایس ایچ او ءِ کر ءَ شتگ ایں بلے آئی ءَ مئے ایپ آئی آر نه زرتگ ، 29 ءَ ما وتی اولی پریس کانپرس کرتگ بلے سرکار ءَ مئے توار گوش نہ داشتگ گڑا 16 جون ءَ ڈی سی کارگس ءِ دیم ءَ زهرشانی کرتگ بلے ڈپٹی کمشنر مئے گندگ ءَ هم نیاتکگ ، چه ایشی ءَ ما لاچار بیتگ ایم 29 جون ءَ شال تپتان ءِ شھدگ بند کرتگ ءُ زھرشانی کرتگ دانکه سرکار مئے توار ءَ اِش به کنت گڑا کمک دمگدار په گپ ءُ تران ءَ مئے کر ءَ اتکگ ءُ مارا دلجمی داتگ بلے چه ایشی ءَ پد ھم ھچ وڑیں گامگیج زورگ نه بیتگ۔
آئی ءَ گوں اھوالکاراں دلگوش گور کرتگ ءُ گوشتگ کہ ما گنی بلوچ ءِ یل نہ کنگ ءِ بگیری ءَ 27 جولائی ءَ زھرشانی کن ایں شما مئے گون ءَ ھمراھداری بہ کن اِت۔ اگاں مئے توار نوں گوش دارگ نہ بوت ما ترندیں گامگیج زورایں۔
