بلوچ راجی زْرمبشت (بی این ایم) ءِ بنجاھی جارکش ءَ سندو دیش ءِ ٹوھیں راھشون سائیں جی ایم سید ءِ سَد ءُ بیستُمی سالروچ ءِ درگت ءَ وتی یک درشانے ءَ گْوشتگ کہ سائیں جی ایم سید سند ءِ بلاھیں راھشونے بیتگ کہ آئی ءَ پہ راجی آجوئی ءَ سند ءِ آجوئی ءِ جھد ءِ بندات کُرتگ۔ آ گوں زانشتی ءُ سیاسی بنیاد ءَ ھمے آسر ءَ سر بیتگ کہ پاکستان یک وتگڑین ءُ زورگریں ریاست ئِے کہ ایردستیں راجانی سرڈگار، پجار، زبان، دود ءُ ربیدگ ءَ ھلاس کنگ ءُ پہ بِھ مارا ایردست کنگ لوٹ ایت۔
جارکش ءَ گْوشتگ کہ سائیں جی ایم سید یک مزنیں زانوگر ءُ سیاسی سروک،باکِرد ءُ نبشتہ کارے بیتگ کہ آئی ءَ وتی دُرسیں کِرد پہ سندی راج ءُ سندو دیش ءَ داتگ ءُ سندو دیش ءِ آجوئی ءِ زْرمبشت جوڑ کُرتگ،زانشتی ءُ سیاسی بنیاد ءَ راجی سروکی ءِ کِرد پیلو کُرتگ۔مرچی سندی راج وتی ٹوھیں راھشون ءِ راہ ءِ راھی اِنت۔
آئی ءَ گْوشتگ کہ پاکستان یک نادراھی یے کہ آئی ءَ ایردستیں راجانی زندگ بیگ ءِ ھک پَچ گِپتگ۔داں پاکستان ءِ ایردست وتی ایردستی ءَ نہ زان اَنت ءُ پہ آجوئی ءَ چِست نہ بنت پاکستان ھمے وڑ ءَ مئے سرڈگار،پجار،مڈّی ءُ راجی ھستمان ءِ گون ءَ گْوازی کنت۔
بی این ایم ءِ جارکش ءَ گْوشتگ کہ بی این ایم سائیں جی ایم سید ءِ سَد ءُ بیستمی سالروچ ءِ درگت ءَ سندی راج ءَ دلجمی دنت کہ بلوچ ھمک گام ءَ پہ سندو دیش ءِ آجوئی ءَ برجاھیں جُھد ءِ پلہ مرزی ءَ کنت ءُ ھمک وڑیں کمک ءَ جاڑی ئیں۔
