اسلام آباد ءَ بلوچ یکجھتی کمیٹی ءِ بندیگیں سروک ءُ زور بیگواھیں مردمانی کھولانی زھرشانی ءَ نُھ روچ سرجم بیتگ کہ انگت ءَ برجاہ اِنت۔ ھمک روچ پولیسءِ زوراکیانی آماچ بوگ ءَ اِنت۔
چو ھمک روچ ءِ وڑ ءَ سانمندیں کھولاں مرچی ھم زھرشانی روانکے کش اتگ کہ روانک ءَ سانمندیں کھولاں ھواراھوالکارءُ انسانی ھکانی کارکناں ھم بھر زرتگ۔ زھرشانی کنوکیں مردماں پہ وتی لوٹانی ھک ءَ اوگام جتگ۔
اے بابت ءَ بلوچ یکجھتی کمیٹی ءِ گوشگ اِنت زھرشانی کنوکیں مردمانی لوٹانی گوش دارگ ءَ ابید پاکستان سرکار ءَ آیانی گونءَ زوراکیءُ بیھار تیز کرتگ اَنت۔ اسلام آباد پریس کلب ءِ راہ بند کرتگ اَنت ءُ اود ءَ بازیں کچے ءَ پولیس کارمند آرگ بیتگ اَنت دانکہ آیانی توار ءَ گٹگیر بہ کنت۔
آئی گوشگ اِنت کہ پُر ایمنیں زھرشانی ءَ جنین، پیرزال ءُ زھگ ھوار اَنت کہ آیانی نشانگ کنگ تھنا راجمستری واک ءِ لگتمالی نہ اِنت بلکیں پہ زانت ءُ سما زوراکیانی شوربندی اِنت ایشی مول آیانی دلپروش کنگ اِنت۔
بی وائی سی ءَ گوں درسیں باسمائیں شھری، اھوالکار ءُ انسانی ھکانی کارکناں لوٹ کرتگ کہ آ توار چست بہ کن اَنت ءُ سانمندیں کھولانی ھمراھداری ءَ بہ کن اَنت۔
