بلوچ لبریشن آرمی ( بی ایل اے ) ءِ جارکش جیھند بلوچ ءَ وتی شنگ کرتگیں درشانے ءَ گوشتگ کہ نوشکے ءَ زورگریں پاکستانی پوج ءِ گون ءَ میڑاں سرمچاراں دژمن ءِ کم چہ کم ھپت کارمند کشتگ، بی ایل اے ءِ چار سرمچار شھید بیتگ۔ چہ ایشی ابید سوراب اُرش ءَ بی ایل اے ءِ نہ ترسیں ھمبلے ٹپی بوگ ءِ لھتیں روچ ءَ پد شھید بیتگ۔
آئی ءَ گوشتگ کہ زورگریں ریاست ءَ 19جولائی ءَ نوشکے ءِ کوھاں مزنیں لشکرکشی یے بندات کرتگ۔ اے لشکرکشی ءَ دژمن ءَ ھیلی کاپٹر ءُ ڈرون ءِ کمک گوں بیتگ۔ پہ دژمن ءِ دیم ءِ دارگ ءَ مئے سرمچاراں گھگیری کرتگ ءُ جتائیں جاھاں اُرش کرتگ۔
جارکش ءَ گوشتگ کہ داں سے روچ ءَ برجاھیں اے لشکری زوراکی ءِ میان ءَ شیشاری ءَ نیمروچ ءَ مئے سرمچار ءُ دژمنیں پوج ءِ میان ءَ دیم پہ دیمی جنگے بندات بیتگ داں دو روچ ءَ برجاہ بیتگ۔ اے جنگ ءَ دژمن ءِ کمانداراں برزی کمک ھم گوں بیتگ۔ جنگ ءِ میان ءَ دژمن ءِ ھپت کاندار مرتگ ءُ باز ٹپی بیتگ۔ اے ترندیں میڑ ءَ مئے چار سرمچار کماندار چیئرمین سپیان کرد، پدائی رشید بزدار، سنگت نبیل بادینی ءُ سنگت ھالد پاروکی مھمدھسنی گوں نہ ترسی ءَ میڑ ءَ شھید بیتگ اَنت۔
آئی ءَ گوشتگ کہ شھید سپیان کرد پنام چیئرمین شاشان ء میر سئید کرد بولان ءِ ھند دشت، جلب گندان دروازوئی ءِ جاہ منند اِنت۔ آ بابو ابدرھمان کرد ءِ پیم ءَ سیاسی، لبزانکی ءُ اھوالکاریں مردمے ءِ نماسگ اِنت۔ یونیورسٹی آپ منیجمنٹ اینڈ ٹیکنالوجی لاھور ءِ پولیٹیکل سائنس ءِ نودربرسپیان کرد بلوچ سیاست ءَ سرگرم بیتگ ءُ یک سالے پیش بی ایل اے ءَ ھوار بیتگ۔ کسانیں وھدے ءَ چہ وتی زانشت ءُ جنگی بودناکیانی بنیاد ءَ کماندار گچین کنگ بیتگ۔
آئیءَ گوشتگ کہ شھید سپیان ءَ نوشکے، شورپارود ءُ ھاران ءِ جنگاں دژمن تاوان داتگ ءُ داں گڈی دمان ءَ گوں سرڈگارءَ وپاداری ءِ ھک پیلو کرتگ۔
جارکش ءَ گوشتگ کہ شھید رشید بزدار پنام میرل ء ھاپز امام دین ڈی جی ھان ءِ ھند اللہ آباد ءِ جاہ مند اِنت۔ آئی ایلمنٹری کالج ڈی جی ھان ءَ وانتگءُ 2022 ءَ بی ایل اے ءَ ھوار بیتگ۔ آ یک سالےءَ پد مجید برگیڈ ءَ ھوار بیتگ ءُ درہ بولان ءُ ھیروپ ءِ وڑیں مزنیں آپریشناں بھر زرتگ۔ شھید رشید ٹپی بوگ ءَ ابید دژمنءِ گون ءَ جنگ برجاہ داشتگ ءُ داں تیرانی ھلاسی ءَ پدائی لیکہ ءِ سر ءَ کار کرتگ ءُ گڈی تیر وت ءَ وت جتگ ءُ دژمن ءِ دست ءَ نہ داتگ۔
آئی ءَ گوشتگ شھید سنگت نبیل بادینی پنام بارگ ء انایت اللہ بادینی نوکشے ءِ ھند کلی جمالی ءِ جاہ منند اِنت۔ شش ماہ پیش گل ءَ ھوار بوگ ءَ پد آئی لانگ کورس سرجم کرتگ ءُ نوشکے ءِ جنگاں وتی پرز پیلو کرتگ۔ چہ ھیلی کاپٹرانی تیرگواری کنگ ءَ ٹپی بوگءَ ابید شھید نبیل داں گڈی تیرءَ جنگ برجاہ داشتگ ءُ ب ایل اے ءِ جنگی راھبندانی سر ءَ کار کرتگ۔
جارکش ءَ گوشتگ کہ شھید سنگت ھالد پاروکی پنام زبیر ء ابدالکیوم مھمد ھسنی کلی اسٹیشن تپتان ءِ جاہ منند اِنت۔ آئی لانگ کورس ءِ سرجم کنگ ءَ پد نوشکے ءِ جنگاں دژمن ءِ بگیری ءَ کاروائیاں بھر زرتگ۔ گوں سرڈگار ءَ کول ءِ پیلو کنگ ءَ شھید ھالد جنگ دیان ءَ وتی جان ندر کرتگءُ شھید بیتگ۔
آئی ءَ گوشتگ کہ دہ جولائی ءَ سوراب ءِ ھند گدر ءَ دژمن ءِ مزنیں بنجل ءِ سر ءَ مئے سرمچاراں ارش کرتگءُ بنجل ءِ دو بھر دستیگ کرتگ۔ ھمےمیان ءَ بی ایل اے ءِ نہ ترسیں سرمچار جنید بلوچ ٹپی بیتگ ءُ رند ءَ آئی ٹپانی درد نہ سگ اتگ اَنت ءُ شھید بیتگ۔
جارکش ءَ گوشتگ کہ شھید جنید پنام کنگ ء نور اھمد نوشکے ءِ ھند زور آباد ءِ جاہ منند اِنت۔ 2014 ءَ بی ایل اے ءَ ھواربوگ ءَ پد آئی کلات، نوشکے ءُ ھاران ءِ جنگاں گوں نہ ترسی ءَ وتی پرز پیلو کرتگ۔ کم امری ءَ ھم جھد ءُ دیمونی ءَ زانشت مزن بیتگ ، جنید سوراب آپریشن ء گوں توکل ءَ دژمن بازیں کچے ءَ تاوان داتگ۔
آئی ءَ گوشتگ کہ بی ایل اے وتی شھیداں سھریں دروت ندر کنت کہ آیاں وتی جانانی دیمونی داتگ ءُ دژمن ءِ زوراکیانی دیم پہ دیمی کنگ ءَ گھگیری ءَ بے مٹیں درورے زندگ داشتتگ۔ اے شھیدی ھمے گپءِ تچکیں منانک اَنت کہ زورگریں ریاست درسیں ٹیکناالوجی، برزی توان ءُلشکری بودناکی ءَ ابید بلوچ راجی آجوئی جھد ءِ دارگ ءَ بے سوب بیتگ۔
جیھند بلوچ ءَ گوشتگ کہ بی ایل اے تچک ءَ گوش ایت کہ دژمن ءِ ھمک زوراکی ءِ پسو ءَ چہ پیش ءَ گیش گوں ترندی ءُ شوربندیاں دےایں۔ بی ایل اے ءِ سرمچار وتی شھیدیں ھممبلانی کاروان ءَ برجاہ دار اَنت ءُ بلوچ آجوئی جھد ءِ داں گڈی آسر ءَ سر کنگ مئے کول اِنت۔
