اسلام آباد: بلوچ یکجھتی کمیٹی ءِ سروک ءُ زور بیگواھیں مردمانی کھولانی زھرشانی ءَ ھپت روچ اِنت کہ برجاہ اِنت۔ مرچی چار روچ اِنت انتزامیہ یکشل ءَ آیاں نیشنل پریس کلب ءَ روگ ءَ دارگ ءُ نیلگ ءَ اِنت۔
زھرشانی ءَ سانمندیں کھولاں ابید اھوالکار، سیاسی ءُچاگردی کارکناں ھوار جتائیں بھرگاں سیادی داروکیں مردم بھر زورگ ءَ اَنت۔ گوستگیں روچ ءَ ترندیں ھور ءِ شلگ ءَ ابید سانمندیں کھول ھور ءِ سر ءَ زھرشانی ءَ نندو ک بیتگ اَنت۔
زھرشانی کنوکیں مردمانی گوشگ اِنت کہ مارا ھپت روچ بیت پر ایمنیں زھرشانی کنگ ءَ ایں بلے چہ انتزامیہ ءِ نیمگ ءَ چہ مئے لوٹانی منگ ءَ ابید یکشل ءَ زوراکی کنگ بوگ ءَ اِنت۔
آیاں گوشتگ کہ ما گون انسانی ھکانی ادارہ،سیول سوسائٹی، وکیل ءُ گوں درسیں بھرگاں سیادی داروکیں مردماں لوٹ کن ایں کہ آ مارا گیش ءَ چہ گیش کمک بہ کن اَنت۔
آیاں گوشتگ کہ مئے گوں سرکار ءَ لوٹ ھمیش اَنت بلوچ یکجھتی کمیٹی ءِ ناھک ءَ بندیگیں سروک زوت یل کنگ بہ بنت ءُ بلوچستان ءَ زوریں بیگواھی بند کنگ ءُ درسیں بیگواھیں مردم یل کنگ بہ بنت۔ دانکہ مئے لوٹ منگ نہ بیتگ اَنت ما وتی زھرشانی ءَ برجاہ دار ایں۔
