اسلام آباد: بلوچ یکجھتی کمیٹیءِ سروکانی ناھکیں دزگیری ءُ زور بیگواھیں مردمانی کھولانی نیمگ ءَ زھرشانی ششمی روچ ءَ برجاہ اِنت۔ مرچی سے روچ اِنت کہ اسلام آباد پولیس زھرشانی کنوکیں مردماں نیشنل پریس کلب ءَ روگءَ نیلگ ءَاِنت۔
اسلام آباد ءَ ھور ءِ گوارگ ءَ ابید سانمندیں کھول بے گدان ءَ ھور ءِ سر ءَ زھرشانی ءَ نشتگ اَنت کہ آیانی تہ ءَ کسانیں زھگ ءُ پیرزال ھم ھوار اِنت۔ دوشی چہ انتزامیہ ءِ بیھارانی پد ءَ گس واھند زھرشانی کنوکیں کھول چہ وتی گس ءَ کش اتگ اَنت۔
زھرشانی کنوکیں مردمانی گوشگ اِنت کہ سرکار چہ مئے لوٹانی منگ ءَ ابید مئے گون ءَ زوراکی کنگ ءَ اِنت۔ ھمک روچ چہ انتزامیہ ءِ نیمگ ءَ زوراکیانی دیمپان کنگ بوگ ءَ ایں بلے دانکہ مئے لوٹ منگ نہ بیتگ اَنت ما وتی زھرشانی ءَ برجاہ دار ایں۔
آیانی گوشگ اِنت کہ مئے لوٹ ھمیش اَنت بلوچ یکجھتی کمیٹی ءِ ناھک ءَ بندیگیں سروک زوتاں چہ زوت یل کنگ بہ بنت ءُ زور بیگواھیں مردم آجو کنگ ءُ بلوچستان ءَ زوریں بیگواھی ءُ بیگواھیں مردمانی درکانودی کوش بند کنگ بہ بیت۔
