اسلام آباد؛ بلوچ یکجھتی کمیٹی ءِ ناھک ءَ دزگیر کنگ بیتگیں سروک ءُ زور بیگواھیں مردمانی کھول نیشنل پریس کلب ءِ دیم ءَ زھرشانی کنگ ءَ روگ ءَ بیتگ اَنت کہ اسلام آباد پولیس ءَ زوراکی کرتگ ءُ داشتگ اَنت۔
زھرشانی کنوکیں مردمانی گون ءَ انسانی ھکانی کارکن ءُ وکیل زینب ایمان مزاری ءُ آدگہ انسانی ھکانی کارکن گوں بیتگ اَنت۔ زھرشانی کنوکیں مردماں اسلام آباد پولیس ءِ زوراکی ءُ بیگواھیں مردمانی آجوئی ءُ بی وائی سی ءِ سروکانی بندی ءِ بگیری ءَ اوگام جتگ۔
چہ زھرشانی جاہ ءَ زینب ایمان مزاری ءَ تران کرتگ ءُ گوشتگ کہ اے یک سکا بژنی گپے اسلام آباد پولیس چہ زھرشانی کنوکیں بلوچ زھگاں جنیناں ترسگ ءَ اِنت ، مرچی سانمندیں کھولانی زھرشانی کنگ ءِ پنچمی روچ اِنت کہ آ دیم پریس کلب ءَ روگ ءَ اَنت پولیس ءَ داشتگ اَنت ءُ روگ ءَ نیلگ ءَ اِنت۔ زی ھم پولیس ءَ زھرشانی کنوک روگ ءَ نہ اشتگ اَنتءُ مرچی ھم نیلگ ءَ اِنت۔
آئی ءَ گوشتگ کہ اسلام آباد پولیس ءِ کارمنداں مئے ھمراہ جنین ءُ زھگ تیلانک داتگ اَنت، دگ ءِ سر ءَ ٹٹ جنگ بیتگ۔ چہ ایشی ءَ ھمے پیش دارگ ءَ اِنت کہ ریاست بلوچاں پاکستانی سرپد نہ بیت۔
